AZƏRBAYCAN-TÜRKİYƏ İŞ ADAMLARI BİRLİYİ YENİ QURUMDUR
AZƏRTAC-ın müxbiri xəbər verir ki, aprelin 19-da idarə heyətinin üzvləri mətbuat konfransı keçirmişlər.
Mətbuat konfransından əvvəl onlar Fəxri xiyabanda ümummilli liderimiz Heydər Əliyevin, Şəhidlər xiyabanında isə Azərbaycan və türk şəhidlərinin xatirəsini yad edərək, məzarların önünə əklillər qoymuşlar. İdarə heyətinin sədri Əhməd Erentok mətbuat konfransını açaraq bildirmişdir ki, ATİB 2002-ci ilin əvvəllərində yaradılmış Türkiyə İş Adamları Dərnəyinin varisidir. İdarə heyətində 7 nəfər Türkiyə, 4 nəfər isə Azərbaycan iş adamlarını təmsil edəcəkdir. Birliyin işlək orqanları - komitələr də yaradılacaq, müntəzəm olaraq Türkiyədə və Azərbaycanda birgə konfranslar keçiriləcəkdir. Arzumuz Türkiyə və dünyadakı türk birlikləri ilə əlaqəni genişləndirmək, Azərbaycana daha çox sərmayə cəlb etməkdir. Əminəm ki, Azərbaycan Prezidenti İlham Əliyevin Türkiyəyə bu yaxınlarda başa çatmış səfəri iki ölkə arasında bütün sahələrdə əməkdaşlığın daha da güclənməsinə təkan verəcəkdir. Azərbaycanda Atatürk Mərkəzinin açılışı mərasimində onun dediyi “Bizim gücümüz birliyimizdədir” sözlərini doğrultmaq üçün səyimizi əsirgəməyəcək, “Azərbaycan Respublikası regionlarının sosial-iqtisadi inkişafı Dövlət Proqramı”nın yerinə yetirilməsində yaxından iştirak edəcəyik.
Əhməd Erentokun sözlərinə görə, idarə heyətinin üzvləri Prezident İlham Əliyevi ATİB-in fəxri sədri, Türkiyənin doqquzuncu prezidenti Süleyman Dəmirəli isə fəxri üzvü görmək istəyirlər.
Mətbuat konfransında jurnalistləri maraqlandıran suallara da cavab verilmişdir.
Bölmənin digər xəbərləri
