AZƏRBAYCAN VƏ İRAN PREZİDENTLƏRİNİN GENİŞ TƏRKİBDƏ GÖRÜŞÜ
Təkbətək görüşdən sonra dövlət başçılarının nümayəndə heyətlərinin iştirakı ilə geniş tərkibdə görüşü oldu.
Azərbaycan Prezidenti İLHAM ƏLİYEV görüşü açaraq dedi:
-Hörmətli cənab Prezident!
Hörmətli qonaqlar!
Sizi bir daha ürəkdən salamlayıram, “Azərbaycana xoş gəlmisiniz!” deyirəm. Ölkələrimiz arasında olan münasibətlər çox sürətlə inkişaf edir. Xalqımızın ümummilli lideri Heydər Əliyevin İrana rəsmi səfərindən sonra bu münasibətlər daha da sürətlə inkişaf edir. Azərbaycan-İran münasibətləri bütün sahələrdə - siyasi, iqtisadi, mədəni və humanitar istiqamətlərdə inkişaf edir və gün-gündən güclənir. Biz əlaqələrimizə böyük önəm veririk. Azərbaycanda bütün sahələrdə olduğu kimi, xarici siyasətdə, o cümlədən İranla Azərbaycan arasında olan münasibətlərdə də Heydər Əliyev siyasəti davam etdirilir. Biz münasibətlərimizin daha da güclənməsini və bütün səviyyələrdə daha da inkişaf etməsini istəyirik.
Hörmətli cənab Prezident, bu baxımdan Azərbaycanda Sizin səfərinizə böyük əhəmiyyət verilir. Biz əminik ki, bu səfər çox uğurlu olacaq və aramızda olan əlaqələr yeni pilləyə qalxacaqdır. Biz artıq təkbətək görüş zamanı müxtəlif məsələləri müzakirə etmişik, fikir mübadiləsi aparmışıq və şübhə etmirəm ki, bu məsləhətləşmələr müxtəlif sahələrdə yaxından əməkdaşlıq etməyimizə imkan verəcəkdir.
Biz çox şadıq ki, Siz Azərbaycana böyük bir nümayədə heyəti ilə gəlmisiniz. Ümidvaram ki, nümayəndə heyətinin üzvləri Azərbaycanda səmərəli işləyəcək və bizim ölkənin rəsmi şəxsləri ilə səmərəli danışıqlar aparacaqlar. İran Azərbaycan üçün dost və qonşu ölkədir. Əminəm ki, bu gözəl münasibətlər davam edəcək, xalqlarımız bir-birinə daha da yaxın olacaqdır.
Bir daha Sizi ürəkdən salamlayıram. Əmin olduğumu bildirmək istəyirəm ki, səfəriniz uğurlu olacaqdır.
İran Prezidenti MƏHƏMMƏD XATƏMİ Azərbaycan Prezidenti İlham Əliyevə təşəkkürünü bildirərək dedi:
-Mən ilk öncə Sizi Azərbaycan Respublikasının Prezidenti seçilməyiniz münasibətilə bir daha təbrik edirəm və Sizi inandırıram ki, münasibətlərimiz daha da inkişaf edəcəkdir.
Mən habelə Azərbaycan xalqının ümummilli liderinin ruhunun şad olmasını arzu edirəm.
İran Prezidenti Məhəmməd Xatəmi rəsmi nümayəndə heyətinin üzvlərini Azərbaycan Prezidentinə təqdim etdikdən sonra dedi:
- Bizim istəyimiz Azərbaycan Respublikasını sabit, iqtisadi cəhətdən inkişaf etmiş və güclü dövlət kimi görməkdir. Siz əmin ola bilərsiniz ki, Azərbaycan Respublikasının iqtisadi inkişafı və sabitliyinin təmin olunması üçün görülən tədbirlərin hamısını alqışlayırıq və bunun üçün əlimizdən gələn köməyi əsirgəməyəcəyik. İran İslam Respublikasının siyasəti və bizim rəsmi şəxslərin fikirləri bundan ibarətdir ki, Azərbaycanla İran arasında münasibətlər inkişaf etdirilməlidir.
Mərhum Heydər Əliyevin Prezidentliyi dövründə İranla Azərbaycan arasında münasibətlərin inkişafında mühüm addımlar atılmışdır. Biz inanırıq ki, Sizin Prezidentliyiniz dövründə də həmin yol davam etdiriləcəkdir. Ümidvaram ki, Azərbaycan Respublikasına səfərimiz həm ikitərəfli münasibətlərin inkişafında, həm də regionda sülhün və sabitliyin möhkəmlənməsində mühüm rol oynayacaqdır. Biz Azərbaycan Respublikasının ərazi bütövlüyünü bir daha təsdiqləyir və elan edirik ki, Azərbaycanla İranın sərhədləri sülh, dostluq və qardaşlıq sərhədləri olacaqdır. Ümid edirik ki, Xəzər dənizinin hüquqi statusu ilə əlaqədar yaxın zamanlarda sahilyanı ölkələrin hamısının mənafeyini təmin edən və bütün tərəfləri qane edən bir razılığa nail olacağıq. Bu baxımdan Tehranda Xəzəryanı ölkələrin dövlət başçılarının zirvə toplantısı bu istiqamətdə mühüm addım olacaqdır. Biz hesab edirik ki, ölkələrimiz arasında münasibətlərin hərtərəfli inkişafı üçün geniş imkanlar mövcuddur. Energetika, kənd təsərrüfatı və ticarət sahəsində çox uğurlu əməkdaşlıq edirik. Sadaladığım sahələrdə əməkdaşlıqdan əlavə, digər istiqamətlərdə də işbirliyinin, layihələrin adını çəkə bilərəm ki, bunlar İran-Azərbaycan münasibətlərində yenilikdir.
Bakı-Astara avtomobil yolunun tikintisi və iki ölkənin dəmir yol xətlərinin birləşdirilməsi, Şimal-Cənub nəqliyyat dəhlizinin inkişaf etdirilməsi və bu xəttin Azərbaycan ərazisindən keçməsi üçün çox mühüm layihələr var ki, bunlar da ölkələrimizi bir-birinə daha yaxından bağlayacaqdır. Naxçıvan Muxtar Respublikasına İran təbii qazının ötürülməsi ilə bağlı layihə də həyata keçiriləcəkdir. İran İslam Respublikasının “Samir” şirkəti vasitəsilə Azərbaycan ərazisində 4 elektrik stansiyasının tikintisi nəzərdə tutulur. Habelə qeyd etməliyəm ki, iki ölkənin sərhəd zonalarında - Astara, Culfa və Poldəşt-Şahtaxtı körpülərinin inşası müzakirə edilir və ümidvarıq ki, bu sahədə də müsbət nəticələr əldə olunacaqdır. Biz Azərbaycanda iqtisadi layihələrin həyata keçirilməsi üçün kreditlər ayırmışıq və çalışırıq ki, Sizin ölkənizə birdəfəlik və əvəzsiz yardımlar ayıraq.
Bu gün mən bir daha Allaha minnətdaram ki, qəlbimin dərinliklərindən gələn arzum yerinə yetmişdir və Azərbaycan Respublikasına səfərə gəlmişəm. Bildiyiniz kimi, cənab İlham Əliyev müxtəlif vaxtlarda bizim müxtəlif nümayəndə heyətlərimiz tərəfindən İrana rəsmi səfərə dəvət olunmuşdur. Bu gün mən burada sizin iştirakınızla bir daha cənab İlham Əliyevi İran İslam Respublikasına rəsmi səfərə dəvət edirəm.
Sağ olun. Təşəkkür edirəm.
Rəsmi dəvətə görə İranın dövlət başçısına təşəkkürünü bildirən Azərbaycan Prezidenti İLHAM ƏLİYEV dedi:
-Hörmətli cənab Prezident, bu dəvətə görə sağ olun. Mən böyük məmnuniyyətlə İran İslam Respublikasına səfər edəcəyəm.
X X X
Sonra görüşdə qarşılıqlı maraq doğuran məsələlər ətrafında geniş fikir mübadiləsi aparıldı.
Bölmənin digər xəbərləri
