Azərbaycan və Litva arasında kənd təsərrüfatı sahəsində əməkdaşlığın genişləndirilməsi məsələsi müzakirə olunub
Bakı, 15 iyul, AZƏRTAC
Kənd təsərrüfatı nazirinin müavini Elçin Zeynalov Litva Respublikası Seyminin Litva-Azərbaycan parlamentlərarası əlaqələr üzrə işçi qrupunun sədri Kazis Starkeviçyusun rəhbərlik etdiyi nümayəndə heyəti ilə görüşüb.
Nazirlikdən AZƏRTAC-a bildiriblər ki, görüşdə Azərbaycanda kənd təsərrüfatına dövlət dəstəyi, aqrar sahədə aparılan islahatlar barədə görüş iştirakçılarına ətraflı məlumat verilib. Bildirilib ki, Azərbaycanda həyata keçirilən aqrar islahatlar kənd təsərrüfatının daha da inkişafını nəzərdə tutur və bu məqsədlə dövlət tərəfindən çox böyük dəstək tədbirləri həyata keçirilir. Görüşdə Azərbaycanın aqrar sektorunun perspektivləri, hökumətin aqrar sahədə prioritetləri, eləcə də bu sahədə innovativ yeniliklər, ixracın inkişafı və kənd təsərrüfatına maliyyə dəstəyi məsələləri ətrafında fikir mübadiləsi aparılıb.
Həmçinin Azərbaycan və Litva arasında kənd təsərrüfatında hazırkı vəziyyət barədə müzakirələr aparılıb. Bildirilib ki, Litva ilə Azərbaycan arasında iqtisadiyyatın bütün sahələrində olduğu kimi, kənd təsərrüfatı sahəsində də əlaqələr inkişaf edir.
Tədbirdə Azərbaycan və Litva arasında kənd təsərrüfatı məhsullarının idxal-ixrac dövriyyəsinin artırılması, ölkəmizdə aqrar sahəyə investisiyaların cəlbi, kənd təsərrüfatının müxtəlif sahələrində elmi tədqiqatların aparılması ilə bağlı təcrübə mübadiləsi məsələlərinə toxunulub. Vurğulanıb ki, iki ölkə arasında kənd təsərrüfatı sahəsində əlaqələrin genişləndirilməsi üçün böyük potensial var.
Hər iki tərəf əməkdaşlıqda maraqlı olduğunu bildirib, gələcək əməkdaşlığın perspektivləri ətrafında fikir mübadiləsi aparılıb.
Bölmənin digər xəbərləri
