AZƏRBAYCAN VOLEYBOLÇULARI ÇİN YIĞMASINA İKİNCİ DƏFƏ UDUZDULAR
AZƏRTAC xəbər verir ki, yığma qadın voleybol komandaları arasında keçirilən dünya “Qran-pri” yarışlarının üçüncü seçmə mərhələsi başlanmışdır. Sentyabrın 1-də Azərbaycan yığması Çinin Ninbo şəhərində bu ölkənin milli komandası ilə qarşılaşmışdır. Görüş 3:1 hesabı ilə Çin voleybolçularının xeyrinə başa çatmışdır (25:18, 25:20, 19:25, 26:24). İlk seçmə mərhələdə komandalar arasında keçirilmiş birinci oyunda da çinlilər qələbə qazanmışdılar - (3:2).
Beləliklə, keçirdiyi 7 oyundan yalnız birini qələbə ilə başa vuran Azərbaycan voleybolçuları 8 xalla 12 komanda arasında sonuncu yerlərdən birini tuturlar. Azərbaycan yığmasının növbəti oyunları sentyabrın 2-də Kuba, 3-də isə Polşa komandaları ilə olacaqdır.
Bölmənin digər xəbərləri
