Azərbaycan xalqı Vətənin suverenliyi və bölünməzliyi uğrunda həmişə həmrəy olub
Bakı, 19 yanvar, AZƏRTAC
Yanvarın 19-da Bakı Beynəlxalq Multikulturalizm Mərkəzində (BBMM) 20 Yanvar şəhidlərinin xatirəsinə həsr olunan tədbir keçirilib.
Mərkəzin icraçı direktoru Azad Məmmədov 1990-cı il yanvarın 19-dan 20-nə keçən gecə keçmiş SSRİ rəhbərliyinin göstərişi ilə sovet hərbi birləşmələrinin Azərbaycan xalqına dəhşətli faciə yaşatdığını qeyd edib. Bu faciəni, eyni zamanda, Azərbaycan xalqının müstəqillik uğrunda mübarizə tarixində yeni səhifə kimi səciyyələndirib. O qeyd edib ki, 20 Yanvarda qətlə yetirilənlərin arasında digər xalqların nümayəndələri də olub, bu isə bir daha sübut edir ki, vahid Vətənin suverenliyi və bölünməzliyi uğrunda Azərbaycan xalqı həmişə həmrəy olub, birlik nümayiş etdirib.
İcraçı direktor nəzərə çatdırıb ki, Bakı Beynəlxalq Multikulturalizm Mərkəzi Azərbaycan multikulturalizminin tədrisi, qurumun müxtəlif ölkələrdə fəaliyyət göstərən filialları və beynəlxalq elita ilə mütəmadi keçirilən görüşlər vasitəsilə 20 Yanvar faciəsini, ümumiyyətlə, Azərbaycan həqiqətlərini dünya ictimaiyyətinə çatdırmaq istiqamətində səylərini bundan sonra da əsirgəməyəcək.
Mərkəzin aparat rəhbəri Aytən Qəhrəman qanlı gecənin dəhşətli statistikasından söz açıb. O deyib ki, sovet qoşunlarının qanunsuz yeridilməsi nəticəsində Bakıda və Azərbaycan rayonlarında 147 nəfər öldürülüb, 744 nəfər yaralanıb, 841 nəfər qanunsuz həbs olunub. Hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlak məhv edilib. Həlak olanlar arasında qadınlar, uşaqlar və qocalar, həmçinin təcili yardım işçiləri, polislər olub. Öncədən düşünülüb hazırlanan bu təcavüzkarlıq aktı Azərbaycan xalqının demokratiya və milli azadlıq uğrunda mübarizəsini boğmaq, xalqı təhqir edərək ona mənəvi zərbə vurmaq məqsədilə reallaşdırılıb. Ancaq xalqımızın azadlıq istəyinə qarşı yönələn bütün təcavüzlərə, zorakılıqlara və faciələrə baxmayaraq aradan keçən 27 il ərzində heç nə sabit iqtisadiyyata, mütəşəkkil orduya malik və ümumxalq birliyinə müvəffəq olan güclü Azərbaycanın formalaşmasına mane ola bilmədi. Ona görə də biz indi 27 il geriyə baxdığımızda 20 Yanvarda Azərbaycanın müstəqilliyi uğrunda şəhid olan, canını əsirgəməyən Vətən övladlarının yazdığı milli tariximizlə qürur duyuruq.
Bölmənin digər xəbərləri
