AZƏRBAYCAN YÜKSƏK İQTİSADİ ARTIM SÜRƏTİNƏ NAİL OLMUŞDUR
AZƏRTAC-ın əldə etdiyi məlumata görə, Azərbaycana bu qiyməti mətbuat üçün açıqladığı illik xülasədə Beynəlxalq Valyuta Fondu (BVF) vermişdir.
Sənəddə deyilir ki, 2007-ci ildə Azərbaycanda ümumi daxili məhsulun (ÜDM) real artımı 23 faiz olmuşdur. Yenə də iqtisadiyyatın başlıca lokomotivi rolunu 37 faiz artımla neft sektoru oynamışdır. Digər sahələrdə, xüsusilə tikinti, ticarət və kommunikasiya sektorlarında bu göstərici nisbətən az - 12 faizə yaxın olmuşdur.
Xülasədə qeyd edilir ki, nəticədə işsizlik və yoxsulluğun səviyyəsi aşağı düşmüş, adambaşına ÜDM-in məbləğı 3,5 min ABŞ dollarını keçmişdir.
Ümumiyyətlə, BVF Azərbaycan iqtisadiyyatının yaxın perspektivindən arxayındır. ÜDM-in real artımı, bu dəfə də neft uğurlarının hesabına, 19 faiz səviyyəsində gözlənilir. Neft sektorsuz bu göstərici 10 faizə yaxın olacaqdır. Ölkənin ödəniş balansının profisiti (müsbət saldo. Büdcədə mədaxilin məxaricdən, ticarət balansında isə ixracın idxaldan çoxluğu) 2007-ci ildəki 29 faiz əvəzinə 36 faiz səviyyəsində proqnozlaşdırılır.
Ehtiyatların həcmi, neft fondu da daxil olmaqla, 2008-ci ilin sonunda 24 milyard dollara çatmalıdır. Bu, əvvəlki ilin göstəricisindən 3 dəfə çoxdur.
