Azərbaycana dost olan ölkələrin deputatları AŞPA-dakı qətnaməyə niyə “hə” dedi? -RƏY
Bakı, 13 fevral, AZƏRTAC
Avropa Şurası Parlament Assambleyasının (AŞPA) Azərbaycan əleyhinə qətnamə qəbul edərkən bizə dost hesab olunan bəzi ölkələrin deputatlarının da prosesə qoşulması təəssüf doğurur. Böyük Britaniya, Moldova, İtaliya və Serbiya kimi dövlətlərin nümayəndələrinin qərəzli kampaniyaya qoşularaq qətnamənin qəbuluna dəstək vermələri heç bir halda onların mövqeyi kimi qəbul edilə bilməz.
Bu sözləri AZƏRTAC-a açıqlamasında politoloq Ramiz Alıyev söyləyib.
O bildirib ki, bəzi ölkələrin AŞPA-dakı nümayəndələri arasında Azərbaycanla bağlı qətnamənin əleyhinə də səs verənlər olub, lehinə də. “Azərbaycanın Britaniya, Moldova, İtaliya, Serbiya kimi ölkələrlə çox yaxşı münasibətləri var. Azərbaycan İtaliyanın elektrik enerjisi təchizatında böyük rol oynayır. Amma bu gün İtaliyada da ümumavropa, xristian maraqlarını hər şeydən üstün tutan deputatlar var. Eyni vəziyyət Moldova, Serbiya ilə də keçərlidir. Hətta qardaş Türkiyənin AŞPA-dakı deputatı Berdan Öztürk də Azərbaycanın əleyhinə səs vermişdi. Bu, həmin Berdan Öztürkdür ki, soyadında “türk” sözünün olmasına baxmayaraq, PKK-nın maraqlarını hər zaman müdafiə edib. O, Türkiyənin əleyhinə olan sənədi dəstəkləyən, terrorçu Abdullah Öcalanı müdafiə edən şəxsdir. AŞPA-dakı deputatlar bir sıra hallarda dövlətlərarası münasibətləri görməzdən gəlirlər və öz siyasi baxışlarına üstünlük verirlər. Xüsusilə də sol təmayüllü deputatlar demokratiya, insan haqları məsələlərində ifrata varırlar. Onlar cinsi, etnik azlıqların maraqlarını dövlətlərin milli maraqlarından üstün tuturlar. Azərbaycana qarşı qətnaməyə səs verənlər əsasən solçu baxışları olan deputatlar olub. Bu mənada biz heç bir halda Türkiyə kimi qardaş, Britaniya, Moldova, İtaliya, Serbiya kimi dost dövlətlərin AŞPA-dakı deputatlarının mövqelərinin həmin ölkələrin mövqeləri kimi qəbul etməməliyik”, - deyə R.Alıyev diqqətə çatdırıb.
Politoloqun sözlərinə görə, solyönümlü deputatlar daha çox Fransa, Almaniya kimi ölkələr tərəfindən istiqamətləndirilir. Azərbaycan AŞPA-ya torpaqlarımız işğal altında olduğuna görə üzv qəbul edilib. Hesab edirdik ki, bu üzvlük təcavüzkar Ermənistanın beynəlxalq təşkilatlar tərəfindən cəzalandırılmasına kömək edə bilər. Avropa Şurası 30 il ərzində bircə dəfə də olsun təcavüzkar Ermənistanın səsvermə hüququnu əlindən almadı, heç bir məhdudiyyət, cəzalandırıcı qərarlar qəbul etmədi. Biz Qarabağ problemini özümüz həll etdik. Bundan sonra Avropa Şurası, Avropa Parlamenti kimi qurumlar bizə lazım deyil. Azərbaycanla əməkdaşlıq, ilk növbədə, Avropa təşkilatlarının özünə lazımdır.
R.Alıyev onu da vurğulayıb ki, bəzi Qərb dövlətlərinin Azərbaycana qarşı qərəzli addımları ölkəmizin əsas hissəsini Naxçıvanla və Türkiyə ilə birləşdirəcək nəqliyyat xəttinin İrandan keçməsinə dair razılaşmadan sonra baş verdi. “Qərb nəqliyyat xəttinin İrandan kənar - Ermənistan keçməsini dəstəkləyirdi. Amma İrəvan Zəngəzur dəhlizinin açılmasına imkan vermədi və belə olan halda, Azərbaycan İranın təklifini qəbul etdi. Əslində, burada günah Ermənistanda və onun havadarlarındadır. Gərək Qərb Ermənistan hakimiyyətinə təzyiq göstərəydi ki, Zəngəzur dəhlizinin açılmasına icazə versin. Düşünürəm ki, Ermənistanın və Qərbin narahatlıqlarına, təzyiqlərinə baxmayaraq, Azərbaycan qarşısına qoyduğu hədəflərə çatacaq”, - deyə o bildirib.
Bölmənin digər xəbərləri
