AZƏRBAYCANDA GƏNCLƏRİN “SƏRHƏDLƏRİ AŞARAQ MƏDƏNİYYƏTLƏRARASI FƏALİYYƏTLƏRİ” MÖVZUSUNDA KONFRANS KEÇİRİLİR
Gənclər və İdman Nazirliyindən AZƏRTAC-a bildirmişlər ki, oktyabrın 23-dən 28-dək Azərbaycanda “Gənclərin sərhədləri aşaraq mədəniyyətlərarası fəaliyyətləri” mövzusunda konfrans keçirilir.
Avropada irqçilik əleyhinə ən böyük qurum olan UNİTED-in -Mədəniyyətlərarası Fəaliyyət Şəbəkəsinin Qafqazda təşkil etdiyi bu ilk konfrans Avropa Gənclər Fondu və Azərbaycan Respublikasının Gənclər və İdman Nazirliyi tərəfindən dəstəklənmişdir.
Konfransda Ermənistan istisna olmaqla, Avropa Şurasının 32 üzv dövlətini təmsil edən 80-dək QHT nümayəndəsi iştirak edir. Tədbir iştirakçıları Avropada İslamofobiya və antisemitizm aktları, faşizm və millətçiliklə mübarizəyə dair müzakirələr və təcrübə mübadiləsi aparacaqlar. Azərbaycanda qaçqın və məcburi köçkünlərin problemləri ilə bağlı məsələlər də müzakirə olunacaqdır.
Tədbirin proqramı 2007-ci ilin aprelində İspaniyanın Madrid şəhərində keçirilmiş işçı qrupunun iclasında müəyyən edilmişdir.
Novxanıdakı “Aqva Park” İstirahət Mərkəzində keçirilən tədbirin oktyabrın 24-də “Park İnn-Azərbaycan” mehmanxanasında rəsmi açılış mərasimi olacaqdır.
Bölmənin digər xəbərləri
