AZƏRBAYCANDA İNFORMASİYA-KOMMUNİKASİYA TEXNOLOGİYALARININ İNKİŞAF SƏVİYYƏSİ MDB ÖLKƏLƏRİ ARASINDA ÜÇÜNCÜDÜR

01.11.2006 [17:51]
Çap et
A⁺ A^-

Rabitə və İnformasiya Texnologiyaları Nazirliyinin mətbuat xidmətindən AZƏRTAC-a bildirmişlər ki, Dünya İqtisadiyyatı üzrə Davos Forumu tərəfindən aparılmış təhlildən sonra dünyanın 115 ölkəsində informasiya-kommunikasiya texnologiyaları (İKT) sahəsində mənfəətin əldə olunmasına hazırlığın vəziyyətini qiymətləndirən hesabat dərc edilmişdir.

2001-ci ildən etibarən hər il qlobal informasiya texnologiyaları hesabatı hazırlayan dünya İqtisadiyyatı üzrə Davos Forumu 2005-2006-cı illərə dair hesabatının 115 ölkəni əhatə edən reytinq cədvəlində Azərbaycanı 73-cü yerdə göstərmişdir.

Hesabatda şəbəkə hazırlığı indeksindən istifadə edilmişdir. Bu indeks ölkənin və ya cəmiyyətin İKT-nin inkişafı üzrə mənfəətin əldə edilməsinə hazırlığının dərəcəsini müəyyən edir.

Davos Forumunun hesabatının reytinq cədvəlindəki ölkəmizin 73-cü yeri MDB ölkələri üzrə Qazaxıstan (60-cı yer) və Rusiyadan (72-ci yer) sonra 3-cü göstəricidir.

Bu cədvəldə digər MDB ölkələrindən Ukrayna 76-cı yerdə, Ermənistan 86-cı, Moldova 94-cü, Gürcüstan 96-cı yerdədir.

Cədvəlin birinci pilləsində ABŞ, ikinci yerdə Sinqapur, üçüncü yerdə isə Danimarka qərar tutmuşdur.