Azərbaycanda keçiriləcək prezident seçkilərində Qazaxıstandan olan müşahidəçilərin siyahısı təsdiqlənib
Astana, 3 aprel, AZƏRTAC
Qazaxıstan Respublikası Mərkəzi Seçki Komissiyasının “2018-ci il 11 aprel Azərbaycan Respublikası prezidenti seçkilərinə Qazaxıstan Respublikasından göndəriləcək müşahidəçilərin siyahısının təsdiqi” məsələsi ilə bağlı iclası keçirilib.
AZƏRTAC xəbər verir ki, bu seçkilərə akkreditasiyadan keçənlərin siyahısına Qazaxıstan Respublikasının ümumilikdə 49 nümayəndəsi daxil edilib. Onların arasından iki nəfər Azərbaycan Respublikası Mərkəzi Seçki Komissiyası tərəfindən seçkiləri müşahidə etməyə dəvət olunub.
MDB müşahidəçilər missiyasına 35 müşahidəçi, o cümlədən Qazaxıstanın regionlarından olan nümayəndələr daxildir.
Qazaxıstan Respublikasının nazirlik və qurumlarından iki nəfər Türk Şurası müşahidəçilər missiyasına, 10 nəfər isə ATƏT-in Demokratik Təsisatlar və İnsan Hüquqları Bürosunun (DTİHB) müşahidəçi missiyasına daxil edilib.
Qazaxıstan Respublikası MSK-nın ümumilikdə 6 nümayəndəsi - MSK-nın sədri Berik İmaşev və aparatın 5 işçisi seçkiləri müşahidə edəcəklər.
Azərbaycan Respublikası prezidenti seçkilərində parlament xətti ilə Qazaxıstan Respublikasının üç təmsilçisi - ikisi Türkdilli Dövlətlərin Parlament Assambleyasının və MDB Parlamentlərarası Assambleyanın missiyasında, biri isə Azərbaycan Respublikası Milli Məclisinin dəvəti ilə iştirak edəcək.
İlahə Əhmədova
AZƏRTAC-ın xüsusi müxbiri
Astana
Bölmənin digər xəbərləri
