Azərbaycanda özəl bölmənin inkişafı müzakirə olunub
Bakı, 19 aprel, AZƏRTAC
İqtisadiyyat Nazirliyi yanında İctimai Şura fəaliyyət planına uyğun olaraq iqtisadi sahədə fəaliyyət göstərən peşəkar ictimai birliklər və assosiasiyalarla müzakirələri davam etdirir. Növbəti belə görüş Azərbaycan Respublikasının Sahibkarlar (İşəgötürənlər) Təşkilatları Milli Konfederasiyası (ASK) ilə keçirilib.
İqtisadiyyat Nazirliyindən AZƏRTAC-a bildirilib ki, qarşılıqlı müzakirələr şəraitində keçən görüşdə Azərbaycanda sahibkarlığın inkişafı, mövcud şəraitdə sahibkarların qarşılaşdıqları məsələlər və onların həllində dövlət-özəl əməkdaşlığının önəminə dair fikirlər bölüşülüb, ASK-nın bu istiqamətdə atdığı addımlar diqqətə çatdırılıb. Sahibkarların ASK ilə komunikasiya mexanizmləri, daxil olan təklif və şikayətlərin ASK tərəfindən aidiyyəti üzrə yönləndirilməsi modeli tədbir iştirakçılarının diqqətinə çatdırılıb. Tərəflər normativ-hüquqi aktların hazırlanması, sahibkarlıq sahəsində fəaliyyəti tənzimləyən qanunvericilik aktlarına dəyişikliklər edilməsi, ümumilikdə bu sahədə hüquqyaratma prosesində iş adamlarının və onların təmsil olunduğu ictimai birliklərin iştirakının əhəmiyyətini qeyd edib.
Görüşdə İctimai Şura üzvləri ilə əməkdaşlıq istiqamətlərinə dair fikir mübadiləsi aparılıb, təkliflər dinlənilib, suallar cavablandırılıb.
Bölmənin digər xəbərləri
