AZƏRBAYCANDA TAUN VƏ VƏBA XƏSTƏLİYİ TƏHLÜKƏSİ YOXDUR
Kütləvi informasiya vasitələrinin verdiyi xəbərə görə, son günlər Tatarıstanda vəba xəstəliyi epidemiyası, Qazaxıstanda isə taun xəstəliyi halları qeydə alınmışdır. AZƏRTAC-ın müxbiri Səhiyyə nazirliyi yanında Taun əleyhinə mübarizə stansiyasına müraciət edərək, bu xəstəliklərin ölkəmizdə yayılmasına yol verməmək üçün görülən tədbirlərdən danışmağı xahiş etmişdir.
Stansiyanın direktoru, tibb elmləri doktoru Maqsud Qasımov bildirmişdir ki, respublikamızda taunun 3 təbii ocağı mövcuddur və onlar il boyu stansiya əməkdaşlarının daimi nəzarəti altındadır. Həmin ocaqlarda gəmiricilər arasında taun epizootiyasi baş verərsə, insanların bu xəstəlikdən qorunması üçün bütün lazımi tədbirlər görüləcəkdir. Məhz bu işlərin düzgün qurulması nəticəsində 30 ildır ki, Azərbaycanda insanlar arasında taun xəstəliyi qeydə alınmamışdır.
Vəba xəstəliyinin profilaktikası üçün isə bütün açıq su mənbələrinin, xüsusən əhalinin daha çox istifadə etdiyi sututarların suyu hər həftə laborator müayinəsindən keçirilir. Vəba törədiciləri aşkar olunduqda, həmin sututarların suyundan istifadə qadağan edilir.
Vəba və taun xəstəliklərinin Azərbaycanda yayılmasının qarşısını almaq üçün görülən tədbirləri əlaqələndirmək məqsədi ilə stansiyada müxtəlif strukturların nümayəndələrinin iştirakı ilə geniş müşavirə keçirilmişdir. Hazırda hava limanlarında, dəmir yolunda stansiya mütəxəssislərinin, respublika sanitar-karantin müfəttişliyinin sə”yi ilə güclü nəzarət tədbirləri həyata keçirilir.
Bölmənin digər xəbərləri
