Azərbaycanda xalça istehsalı 41 dəfədən çox artıb – QRAFİK
Bakı, 25 avqust, AZƏRTAC
Cari ilin yanvar-iyul aylarında Azərbaycanda 78 min kvadratmetr xalça və xalça məmulatları istehsal edilib. Bu da ötən ilin müvafiq dövrü ilə müqayisədə 41,1 dəfə çoxdur.
AZƏRTAC Dövlət Statistika Komitəsinin məlumatlarına istinadla xəbər verir ki, avqustun 1-i vəziyyətinə sənaye müəssisələrinin anbarlarında hazır məhsul ehtiyatı illik müqayisədə 7,1 faiz azalaraq 5,2 min kvadratmetr təşkil edib.
Dövlət Gömrük Komitəsinin hesabatına əsasən, bu ilin yeddi ayında Azərbaycandan xarici bazarlara 229,13 min dollar dəyərində xalçalar və digər toxunma döşəmə örtükləri ixrac edilib. Bu göstərici ötən ilin müvafiq dövrü ilə müqayisədə 4,5 dəfə çoxdur.
Ölkəyə idxal edilən xalça və digər toxunma döşəmə örtüklərinin dəyəri isə illik müqayisədə 12,5 faiz azalaraq 9 milyon 852,78 min dollar təşkil edib.
Xatırladaq ki, 2025-ci ilin yanvar-iyul aylarında Azərbaycanda 1,9 min kvadratmetr xalça və xalça məmulatları istehsal edilib. Həmin dövrdə Azərbaycandan 50,83 min dollar dəyərində xalçalar və digər toxunma döşəmə örtükləri ixrac edilib, idxal isə 11 milyon 258,61 min dollar təşkil edib.
Bölmənin digər xəbərləri
