Azərbaycanı “ADEX”də təmsil edən şirkətin nümayəndəsi: İlin sonunadək bir neçə ölkəyə ixracımız olacaq
Bakı, 24 sentyabr, Göyçək Mahmudlu, Elmir Səftərov, AZƏRTAC
“Improtex Industries” şirkətlər qrupu 33 ildir Azərbaycanda fəaliyyət göstərir. Onun 10 ilini istehsalla məşğuluq. İki il bundan əvvəl müdafiə sənayesində ilk addımlarımızı atmağa başlamışıq. Hər dəfə Azərbaycan Beynəlxalq Müdafiə “ADEX” sərgisində yeni məhsulla çıxış edirik. Ötən dəfə minatəmizləyənlər, bu dəfə ITX zirehli maşınlar ailəsini təqdim edirik”.
AZƏRTAC xəbər verir ki, bunu “Improtex Industries” MMC-nin baş direktoru Fərid Abdullayev jurnalistlərə müsahibəsində deyib.
Sərgidə üç modelin (ITX 20H, ITX 15M, ITX 6M) nümayiş olunduğunu bildirən baş direktor söyləyib: “ITX ITX 20H 19 ton kütləsi olan və minalara qarşı personal daşıyıcı maşındır. Üzərində avtomatik idarə olunan silah, lazer naviqasiyası, gecə görməsi, nişanın izlənilməsi, avtomatik nişan alınması funksiyası var.
ITX 15M tibbi məqsədlər üçündür. Yəni, döyüş bölgəsindən yaralıların təxliyəsi və reanimasiyaya yerləşdirilməsi üçün avadanlıqla təchiz olunub. Ordu birləşmələrinin tələbatından asılı olaraq fərqli qoruma səviyyəsi, fərqli konfiqurasiya ilə təmin etmək olar. Bu, patronlaşma, personal daşıyıcı, komanda-qərargah maşını ola bilər. Özəllik ondadır ki, tam yerli istehsaldır. Həm minatəmizləyənlər, həm də ITX maşınları yerli mühəndislik məktəbinin məhsullarıdır. Tədarükçülərlə işləyir və dünyanın aparıcı ölkələri ilə çalışırıq. ABŞ-ın, İtaliyanın, Çexiyanın, Çinin, Türkiyənin aparıcı şirkətləri ilə əməkdaşlıq edərək maşınları ərsəyə gətirmişik. İldən-ilə mümkün qədər çox hissələri Azərbaycanda emal edib istehsal etmək niyyətindəyik. Məqsədimiz müdafiə qurumlarının, ordu birləşmələrinin idxaldan asılılığının öz çərçivəmizdə azaldılması və onların istəklərinə tam uyğun olacaq və xırda özəlliklərin də nəzərə alınacağı bir texnika hazırlamaqdır. Təbii ki, buna nail olandan sonra ixrac üçün də böyük ümidimiz yaranır. Bu baxımdan, “ADEX” əhəmiyyətli platformadır. Burada fərqli ölkələrin nümayəndələri texnika ilə yaxından maraqlana bilirlər. Mina problemi bir çox ölkələrdə olduğundan bir çox ölkədən minatəmizləyənlərlə bağlı müraciətlər olur. Hələ ki, həmin texnikanı cəmi bir ölkəyə ixrac etmişik. İlk məqsədimiz yerli ehtiyacları ödəməkdir. Bu ilin sonuna bir neçə ölkəyə ixrac olacaq. ITX isə ilk prototip maşındır. Onların növbəti 3-4 ay ərzində yürüş testlərini tamamlaması lazımdır, yeni ildən sertifikatlı seriya istehsalına hazır olacağıq. Burada da ilk məqsəd yerli tələbatı qarşılamaq, sonra gələn müraciətləri dəyərləndirməkdir. Təbii ki, ixraca böyük marağımız var. Müdafiə sənayesi öz-özlüyündə iqtisadiyyatın mühüm hissəsidir. Kifayət qədər inkişaf etmiş və böyük ixrac potensialı olan sahədir. İnanırıq ki, Azərbaycanda bu sahə gündən-günə inkişaf edəcək və bizim məhsulları bir çox ölkədə görə biləcəyik”.
Bölmənin digər xəbərləri
