Azərbaycanın Çindəki səfirliyində yaradılan məntəqə seçki komissiyası prezident seçkilərinə hazırdır
Pekin, 3 aprel, AZƏRTAC
Azərbaycanın Çindəki səfirliyində yaradılmış məntəqə seçki komissiyası aprelin 11-də keçiriləcək prezident seçkilərinin qanunvericiliyin tələblərinə uyğun qaydada təşkili üçün tam hazırdır.
AZƏRTAC xəbər verir ki, Azərbaycan Respublikasının müvafiq qanunlarına, o cümlədən Seçki Məcəlləsinə uyğun olaraq ölkənin hüdudlarından kənarda yaşayan vətəndaşlarımızın seçki hüququnun təmin edilməsi məqsədilə xarici ölkələrdəki səfirlik və konsulluqlarımızda məntəqə seçki komissiyaları yaradılıb. Ümumilikdə, xaricdə 41 seçki məntəqəsi formalaşdırılıb.
Azərbaycanın Pekindəki səfirliyində 17 saylı Yasamal üçüncü seçki dairəsinin 37 saylı məntəqəsi yaradılıb. Məntəqə seçki komissiyası konsulluq qeydiyyatında olan vətəndaşlarımızın prezident seçkiləri ilə əlaqədar maarifləndirilməsi üçün bütün zəruri işlər görülüb. Belə ki, səsvermədə iştirakla əlaqədar konsulluq qeydiyyatında olan vətəndaşlarımızın elektron poçt ünvanlarına, mobil telefonlarına bildirişlər göndərilib. Bundan başqa, səfirliyin rəsmi internet səhifəsində və həmvətənlərimizin “Wechat” messencer proqramındakı qruplarında elan yerləşdirilib.
Qeyd edək ki, Azərbaycanın Çindəki səfirliyində yaradılan məntəqə seçki komissiyasında bu ölkədə yaşayan vətəndaşlarımızla yanaşı, müxtəlif səbəblərdən həmin gün Pekində olacaq səsvermə hüququ olan seçicilər də səs verə biləcəklər.
Bakı ilə saat fərqinə əsasən, səsvermə prosesi ilk olaraq Pekindəki səfirlikdə yaradılan məntəqə seçki komissiyasında başlayacaq.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
