Azərbaycan Respublikası Dövlət Sərhəd Xidmətinin mətbuat xidmətindən AZƏRTAC-a bildirmişlər ki, dövlət sərhədinin pozulması hallarına, narkotik vasitələrin qanunsuz dövriyyəsinə, qaçaqmalçılığa qarşı mübarizə tədbirləri davam etdirilir.

Bu il avqustun 3-də Şərur rayonunun Ərəb Yengicə kəndi ərazisində yerləşən sərhəd zastavasının xidməti sahəsində əməliyyat tədbiri nəticəsində 1.200 kvadratmetr sahədə yabanı halda bitmiş 7.654 ədəd (941 kiloqram) çətənə kolu aşkara çıxarılmış və yandırılaraq məhv edilmişdir.

Avqustun 25-də “Astara” sərhəd nəzarəti məntəqəsində sərhəd və gömrük yoxlaması zamanı İrandan gələn bir nəfər Azərbaycan Respublikası vətəndaşının siqaret qutusunda və paltarında gizlətdiyi 7 qram brilyant tozu aşkar edilərək yerli gömrük idarəsinə təhvil verilmişdir.

Avqustun 27-də saat 03:00 radələrində Ağstafa rayonunun Sadıxlı kəndi ərazisindəki zastavanın sahəsində xidmət aparan sərhəd naryadı Azərbaycandan Gürcüstana dövlət sərhədi istiqamətində hərəkət edən, dövlət nömrə nişanı olmayan “KaMAZ” markalı avtomaşını saxlamaq üçün zəruri tədbirlər həyata keçirmiş, lakin sərhədçilərin qanuni tələblərinə tabe olmayan sürücü böyük sürətlə dövlət sərhədi xəttinə tərəf hərəkətini davam etdirimiş və nəticədə avtomaşını aşırmışdır. “KaMAZ”ın aşması nəticəsində 10 tona yaxın dizel yanacağı yerə tökülmüş, bir nəfər sərhədçi xəsarət almışdır. Faktla bağlı cinayət işi qaldırılmışdır.

Ötən ay dövlət sərhədində Azərbaycandan Gürcüstana 10 ton 895 litr dizel yanacağının və 2 ton 603 kiloqram əlvan metalın, Gürcüstandan Azərbaycana isə 100 qutu siqaretin qeyri–qanuni keçirilməsinin qarşısı alınmışdır.

Həmin müddətdə 7.408 qutu müxtəlif markalı siqaretin, 248 ədəd pivə məhsulunun, 108 qutu müxtəlif markalı çayın, 778 ədəd kosmetik vasitələrin Rusiya Federasiyası ilə dövlət sərhədindən qanunsuz keçirilməsinə yol verilməmişdir.

İran İslam Respublikası ilə dövlət sərhədində 51 baş iribuynuzlu və 70 baş xırdabuynuzlu mal-qaranın, 1.880 ədəd antentənzimləyən cihazın, çoxlu geyim məmulatının və spirtli içkinin Azərbaycandan bu ölkəyə qeyri-qanuni keçirilməsinin qarşısı alınmışdır.

Sərhədçilərin sayıqlığı avqust ayında 25 halda dövlət sərhədinin pozulmasının qarşısının alınması ilə nəticələnmiş, sərhədi pozan 10 nəfər Azərbaycan, 5 nəfər İran və 3 nəfər Gürcüstan vətəndaşı tutulmuş, bununla yanaşı sərhəd rejimi qaydalarına əməl etmədiklərinə görə 27 nəfər Azərbaycan, 5 nəfər İran, 1 nəfər Gürcüstan və 1 nəfər Rusiya vətəndaşı saxlanılmışdır.

Axtarışda olan 32 şəxs dövlət sərhəd buraxılış məntəqələrində müəyyənləşdirilərək yaxalanmış, 6 nəfər İran, 4 nəfər Azərbaycan, 1 nəfər Gürcüstan və 1 nəfər Cənubi Afrika Respublikası vətəndaşı saxta sənədlərlə, 3 nəfər Azərbaycan, 2 nəfər Rusiya, 1 nəfər İran, 1nəfər Gürcüstan və 1 nəfər Türkiyə vətəndaşı başqasına məxsus sənədlərlə, habelə müxtəlif ölkələrin 100 nəfər vətəndaşı müvafiq sənədləri olmadığına görə saxlanılmışdır. Bundan əlavə, 2 nəfər Nigeriya və 1 nəfər Almaniya vətəndaşı vizalarının olmaması, müxtəlif ölkələrin 9 vətəndaşı isə şübhəli şəxs qismində saxlanılaraq, barələrində müvafiq tədbirlər görülmüşdür.