AZƏRBAYCANIN FÖVQƏLADƏ HALLAR NAZİRLİYİ İLƏ BMT İNKİŞAF PROQRAMININ ƏMƏKDAŞLIĞININ PERSPEKTİVLƏRİ MÜZAKİRƏ OLUNMUŞDUR
Gələcək əməkdaşlığın perspektivlərinin müzakirə olunduğu görüşdə Kəmaləddin Heydərov BMT İnkişaf Proqramı ilə qarşılıqlı fəaliyyətin sıx əlaqələndirilməsinə ciddi hazırlıq görüldüyünü diqqətə çatdırmış, nazirliyin fəaliyyətini Azərbaycanın hər bir vətəndaşı üçün təhlükəsiz həyat, iş və istirahət prinsipinə uyğun olaraq qurduğunu söyləmişdir.
Ölkəmizin iqtisadi inkişafı barədə ətraflı məlumat verən nazir, Xəzər dənizində yük daşımalarının intensivliyinin artması, neft, dağ-mədən, emal sənayelərində və inşaat sektorunda uğurlu inkişafın, əhalinin təhlükəsizliyini təmin edən və fövqəladə hallarda sayıqlığı yüksəltmək üçün profilaktik tədbirlərin rolunun əhəmiyyətli dərəcədə artdığını diqqətə çatdırmışdır. K.Heydərov bildirmişdir ki, Azərbaycanda, xüsusən də Bakıda tikinti işləri geniş vüsət almışdır. Nazirliyin müvafiq qurumunun müşahidələri və keçirilən reydlər göstərir ki, heç də həmişə yaşayış binaları və sənaye obyektləri təyinatına və müvafiq tikinti normalarına uyğun gəlmir. Həmçinin, fövqəladə hallar yarandıqda təcili təsiretmə imkanlarına diqqəti yönəldən K.Heydərov bildirmişdir ki, bu, vətəndaşların normal həyat fəaliyyətini tənzimləyəcəkdir.
Fövqəladə hallar nazirinin fikirlərini dəstəkləyən Marko Borsotti fövqəladə hallara operativ reaksiya verilməsini təmin edən nazirliyin Azərbaycanda vaxtında yaradıldığını vurğulamış, dəyişən dünyanın fövqəladə hallardan heç də sığortalanmadığını, bunun üçün hər bir ölkədə yaradılan oxşar qurumların çevik və qüvvətli olmasının vacibliyini söyləmişdir. Marko Borsotti Azərbaycanda yeni yaradılan nazirliyin normal fəaliyyətini və işinin təşkili üçün qarşılıqlı əməkdaşlıq perspektivlərinin müəyyən edilməsində ikitərəfli işçi qrupunun yaradılmasını təklif etmişdir.
Təklifi razılıqla qarşılayan nazir Kəmaləddin Heydərov, diqqəti birgə əməkdaşlığın konturlarına yönəltmişdir.
Görüşdə qarşılıqlı maraq doğuran digər məsələlər barədə də ətraflı fikir mübadiləsi aparılmışdır.
Bölmənin digər xəbərləri
