Azərbaycanın gənc musiqiçiləri
Dilşad Fərhadzadə
Bakı, 27 dekabr, Anara Axundova, AZƏRTAC
AZƏRTAC Azərbaycanın beynəlxalq müsabiqələrin laureatları olan istedadlı gənc musiqiçiləri haqqında məqalələr silsiləsini davam etdirir.
Bugünkü həmsöhbətimiz Dilşad Fərhadzadə - skripkaçı, Bülbül adına orta ixtisas musiqi məktəbinin 3-cü sinif şagirdi, bir neçə beynəlxalq müsabiqələrin iştirakçısı və laureatıdır. Gənc skripkaçı 2022-ci ildə Budapeştdə keçirilən “VII DANUBIA Talents International Music Competition” müsabiqəsində iştirak edərək Qran-pri qazanıb.
İstedadlı skripkaçının pedaqoqu Lalə Hüseynova deyir: “Dilşad notları hərflərdən tez, 4 yaşında oxumağa başlayıb. Mən adətən uşaqları bu erkən yaşda məşğul olmağa götürmürəm. Lakin o gələndə, mən onda maraq, şüurluluq hiss etdim. Biz sadəcə sınamaq qərarına gəldik (gülür). Budur, o, 5 yaşından müsabiqələrdə iştirak edir və qalib yerləri tutur. Təəssüf ki, həmin vaxt pandemiya idi və biz müsabiqələrdə onlayn iştirak etməyə məcbur olurduq.
Dilşad özü deyir ki, müsabiqədə “canlı” iştirak etmək daha çətindir. Lakin səhnəyə çıxmaq videoya çəkilməkdən daha maraqlıdır.
Pandemiya səngiyəndən sonra Dilşad müsabiqələrə gedə bildi, Moskvada və iki dəfə Parisdə oldu. Skripkaçı Budapeştdə Nikkolo Paqanininin variasiyaları və Fikrət Əmirovun valsı ilə çıxış edib.
“Müsabiqə üçün proqram seçimində biz uşaqların imkanlarını nəzərə alırıq ki, onlar proqramın öhdəsindən gələ bilsinlər. Nəinki öhdəsindən gəlsinlər, həm də ən yüksək səviyyədə nümayiş etdirsinlər. Qalib gəlmək üçün çox mühümdür ki, əsərlərin yaxşı seçimini edəsən. Əlbəttə ki, işləmək lazımdır!”, - deyə Lalə Hüseynova vurğulayır.
Müsabiqəyə hazırlıq 2022-ci ilin bütün yay ayları ərzində aparıldı. Çalışqan qız hər gün, bəzən 4 saat məşğul olurdu. Dilşad etiraf edir ki, çıxışdan əvvəl həyəcanlanıb, lakin çalmağa başlayan kimi həyəcan itirdi. O, öz qələbəsi barədə öyrənəndə hətta əvvəlcə inanmırdı.
Dilşadı onunla birgə müsabiqəyə gedən müəlliməsi Lalə xanım dəstəkləyirdi.
Pedaqoq deyir: “Mən həmişə şagirdlərimdən çox həyəcanlanıram! Elan ediləndə ki, Dilşad Qran-pri qazanıb, mən böyük xoşbəxtlik hiss elədim. Rahatlıq yarandı ki, bizim əməyimiz boşa getməyib, yay istirahətini əbəs yerə sərf etməmişik və bu yolu nahaqdan qət etməmişik”.
Budapeştdə olmaq Dilşadın çox xoşuna gəlib. O deyir ki, müsabiqələri çox sevir və mütləq yenə iştirak edəcək.
“Mən Vyanaya, Almaniyaya və ya İtaliyaya getmək istərdim”, - deyə həmsöhbətimiz arzularını bölüşüb.
Laureatlar yetişdirən, 33 illik pedaqoji staja malik Lalə Hüseynova müsabiqələrdə iştirakın gənc musiqiçilər üçün faydalı olduğunu bildirir. O deyir: “Öz alətini sevənlər, səy göstərənlər üçün stimul olmalıdır və bu işdə müsabiqələr bizə çox kömək edir, uşaqlar daha çox məşğul olmağa başlayır. Lakin müsabiqə bizim əsas hədəfimiz deyil. Başlıcası onları çalışqan etməkdir ki, onlar üçün hər yerə yol açıq olsun”.
Lalə Hüseynova, eyni zamanda hesab edir ki, əgər müsabiqələr uşaqda böyük stress yaradırsa, o halda müsabiqələrsiz də keçinmək olar. Pedaqoqun sözlərinə görə, dünyanın bir çox tanınmış musiqiçiləri heç bir müsabiqədə iştirak etməyiblər, lakin yüksək peşəkara çevriliblər.
“Müsabiqə uşağın inkişafı üçün yollardan biridir, lakin xeyli başqa vasitələr də var. Konsertlərin təşkili, çıxışlar, digər tədbirlər də uşaqları inkişaf etdirir. Düzdür, bunlar onlar üçün böyük əsəb gərginliyidir. Elə böyüklər üçün də, axı hər bir uşağın arxasında pedaqoq durur. Müəllimin uşaqlara ötürdüyü bilik, bacarıqların nəticəsi həm müsabiqələr, həm Prezident təqaüdləri, həm də konsertlərdir. Bu, böyük əməkdir. Biz bu nəticələri gördükdə, bax, bu əsl xoşbəxtlikdir!”, - deyə Lalə Hüseynova əlavə edib.
Bölmənin digər xəbərləri
