Azərbaycanın güləş yığmaları Avropa çempionatına hazırlaşır
Bakı, 17 aprel, AZƏRTAC
Azərbaycanın yunan-Roma və sərbəst güləş üzrə U-15 yığmaları Avropa çempionatına hazırlaşır.
Azərbaycan Güləş Federasiyasından AZƏRTAC-a verilən məlumata görə, yunan-Roma güləşçiləri böyük məşqçi Əbilfət Məmmədov və məşqçi İlham Vezirovun rəhbərliyi altında təlim-məşq toplanışını Bakıda keçir.
Qitə birinciliyinə hazırlıq məqsədilə toplanışa 26 güləşçi cəlb edilib. Aprelin 15-də Tofiq Bəhramov adına Respublika Stadionunun güləş zalında startı verilən hazırlıq prosesi ayın 27-dək davam edəcək.
Sərbəst güləşçilər isə Xaçmaz Olimpiya İdman Kompleksində bir araya gəliblər. Böyük məşqçi Namiq Quliyev, məşqçilər Elşad Allahverdiyev və Xəqan Süleymanovun rəhbərliyi altında 26 güləşçi toplanışda iştirak edir. Aprelin 13-də başlayan hazırlıq prosesinə ayın 23-də yekun vurulacaq.
Qeyd edək ki, hər iki komandanın təlim-məşq toplanışı fiziki hazırlığın yüksəldilməsi məqsədilə keçirilir. U-15 Avropa çempionatı mayın 15-dən 18-dək Yunanıstanın Lutraki şəhərində təşkil ediləcək.
Bölmənin digər xəbərləri
