Bakı, 14 fevral, AZƏRTAC

Azərbaycan Cənubi Qafqazda əsas, mərkəzi aktor olmaqla kifayətlənmir, həmçinin beynəlxalq hüququn və dövlət aktorlarının siyasi maraqlarının qayğısına qalır. Çünki beynəlxalq münasibətlər sistemini nizamlayan beynəlxalq hüququn aliliyi itib, müstəqil dövlətin isə nəinki rolu qalmayıb, bu rolun dərk edilməsi belə ambivalent durumdadır. Beynəlxalq hüququn aliliyi prinsipinin unudulması, görməzdən gəlinməsi Azərbaycanı reallığı zamanında görərək proaktiv siyasət yürütməyə vadar etdi. Məsələmizi milli ideya edərək ətrafında sıx birləşdik.

Bu fikirləri AZƏRTAC-a açıqlamasında siyasi elmlər üzrə fəlsəfə doktoru, politoloq Şəbnəm Həsənova söyləyib.

Politoloq qeyd edib: “Dünyaya boylandığımız zaman bir məsələ mütləqdir ki, bu gün dövlət əsasa çevrilməli, siyasi qurumlar, beynəlxalq təşkilatlar işlək vəziyyətə gəlməlidir. Təəssüflər olsun ki, biz yalnız təsviri funksiyaların mövcud olduğunu görürük. Siyasi təsisatlar nəinki qərəzli yanaşma sərgiləyir, ikili standartlar üzərində qurulub, onların qərarları belə paradoksaldır, hətta aparıcı media ruporları belə güclənən aktorlara qarşı çirkin kampaniyalara qərq olublar. Beynəlxalq sistemdə dərin dəyişikliklərin, mənfi tendensiyaların mövcudluğunu etiraf etmək lazımdır, bu etiraf içində Azərbaycanın yeni dünya düzənində önəmli yeri də olmalıdır. Hər nə qədər çalışsalar da, bu yeri laxlada bilmirlər”.

O bildirib ki, digər əsas məqam isə dövlətin zəifləməsi prosesi, dövlət aktorunun statusunu və varlığını şübhə altına alan variantların meydana çıxması, yaxud çıxarılmasıdır. Azərbaycan müstəqil siyasət yürüdür, daxili və xarici siyasətində də, beynəlxalq sistemdə də tabeçilikdən azaddır. Bunu təzyiq tətbiq etməyə, təhdidə əl atmağa çalışan istənilən tərəf bilməlidir.

Diqqətə çatdırılıb ki, Azərbaycan dövləti beynəlxalq dinamikada üstünlük əldə edib və dövlətin beynəlxalq hüquq nizamının ən fundamental vahidi olduğu əhəmiyyətinin qətiyyəti üzərində dayanır. Həyat tərzi, ailə dəyərləri, multikultural və multietnik cəmiyyət də buraya daxildir.

Azərbaycan müəyyən edilmiş ərazi üzərində suverenlik, daimi əhali ilə dövlət arasında monolit birlik, hökumət və digər dövlət subyektləri ilə münasibətlər qurmaq qabiliyyəti kimi məsələləri yəni, deklarativ dövlətçilik nəzəriyyəsini müstəqil formada tətbiq edir. Bu gün bir çox dövlətlərdə nadir rast gəlinən məsələ olsa da, dövlətimizin başçısının şəxsi keyfiyyətləri və üstün siyasi bilikləri nəticəsində rolumuz, mövqeyimiz üstün səviyyədədir.

Xarici siyasətimiz isə şaxələndirilmiş vəziyyətdədir. Azərbaycan Bayden administrasiyası dönəmində itirilmiş dörd ili də bərpa etməyə hazırdır. USAID kimi təsisatın dağıdıcı, destruktiv fəaliyyəti ABŞ-Azərbaycan münasibətlərinə fundamental zərbə vuran amil idi. Şaxələndirilmiş xarici siyasət konsepsiyamızın uğurları “ideologiya, iqtisadiyyat və milli ideyalar” olmaqla üç təməl üzərində daha sağlam dayanır.

“Azərbaycan dünyanın qabarıq formada üzə çıxan gücü Çinlə strateji tərəfdaşdır. Mərkəzi Asiya ilə dərinləşən münasibətlər, COP29 çərçivəsində Azərbaycan, Qazaxıstan və Özbəkistan arasında Xəzər dənizinin dibi ilə enerji kabelinin çəkilməsi barədə müqavilənin imzalanması Mərkəzi Asiya ilə Azərbaycanın, eyni zamanda, potensial olaraq Çinin enerji kabeli ilə bir-biri ilə bağlanması deməkdir. Azərbaycan Şərqlə Qərb, Şimalla Cənub arasında körpüdür və Qlobal Cənubun bir hissəsi olaraq ikincinin maraqlarını müdafiə edir. Uğurla ev sahibliyi etdiyimiz COP29 çərçivəsində də Qlobal Cənubla Qlobal Şimal arasında daha möhkəm körpülər qurmaq istiqamətində əməli addımlar atdıq. Cəmiyyətdə sabitlik və sakitliyin nəticəsidir ki, qlobal aktorlar ölkəmizə etimad göstərirlər. Xarici siyasətimiz proaktiv vəziyyətdə və daim işləkdir. Bütün bunlar Prezident İlham Əliyevin uzaqgörən siyasətinin tərkib hissəsidir və şübhəsiz ki, zamanında əsası Ümummilli Liderimiz Heydər Əliyev tərəfindən qoyulan həmin bu çoxşaxəli, balanslı, bir neçə istiqamətdə Azərbaycanın maraqlarını təmin edən siyasət bu gün dövlətimizin başçısı tərəfindən birmənalı şəkildə davam etdirilir. Bu siyasət birmənalı qaydada cəmiyyət tərəfindən dəstəklənir. İddialarımız və hədəflərimiz potensialımızla düz mütənasibdir”, - deyə politoloq vurğulayıb.