AZƏRBAYCANIN MDB-DƏKİ FƏALİYYƏTİ MÜSBƏT QİYMƏTLƏNDİRİLİR
Bu günlərdə Bakıdan qayıtmış MDB-nin İcraiyyə Komitəsinin sədri – icraçı katibi Vladimir Ruşaylo AZƏRTAC-ın müxbirinə müsahibəsində bildirmişdir ki, Azərbaycan paytaxtında onun Prezidenti İlham Əliyevlə səmərəli danışıqları olmuşdur. Onun sözlərinə görə, Azərbaycanın dövlət başçısına Belarusda keçirilmiş referendumun nəticələri, Ukraynada prezident seçkilərinə hazırlığın gedişi barədə məlumat verilmişdir. V.Ruşaylo bildirmişdir ki, Azərbaycan özünün beş nümayəndəsini MDB müşahidəçiləri tərkibində bu seçkilərə göndərəcəkdir. Bundan əlavə, Azərbaycan Prezidenti ilə görüşdə MDB-nin Astanada keçirilmiş forumunda dövlət başçılarının qəbul etdikləri qərarlarla bağlı məsələlər, o cümlədən Birliyin fəaliyyətini təkmilləşdirmək məsələsi müzakirə olunmuşdur. Azərbaycanın MDB çərçivəsində həm çoxtərəfli, həm də ikitərəfli formatda iqtisadi inteqrasiyası məsələsi də müzakirə mövzusu olmuşdur. MDB-nin icraçı katibi demişdir: “Mən Azərbaycanın MDB-də fəaliyyətini çox yüksək qiymətləndirirəm. Bizim üçün, MDB-nin İcraiyyə Komitəsi üçün Birliyin bütün 12 dövlətinin mənafelərini və rolunu nəzərə almaq çox vacibdir”.
V.Ruşaylo MDB Elektroenergetika Şurasının bu günlərdə Bakıda Rusiyanın energetika kompleksi nümayəndələrinin iştirakı ilə keçirilmiş iclasına da yüksək qiymət vermişdir.
Bölmənin digər xəbərləri
