AZƏRBAYCANIN MÜASİR TARİXİNİN İLHAM ƏLİYEV MƏRHƏLƏSİ
Kitabda Prezidentin İcra Aparatının ictimai-siyasi şöbəsinin müdiri, tarix elmləri doktoru, professor Əli Həsənovun, parlamentin iqtisadi siyasət daimi komissiyası sədrinin müavini, iqtisad elmləri namizədi Azər Əmiraslanovun, Prezidentin İcra Aparatının xarici əlaqələr şöbəsinin müdiri Novruz Məmmədovun, Milli Məclis sədrinin birinci müavini Ziyafət Əsgərovun, parlamentin deputatı Mübariz Qurbanlının, Milli Məclisin iqtisadi siyasət daimi komissiyasının sədri, akademik Ziyad Səmədzadənin, əmək və əhalinin sosial müdafiəsi naziri Füzuli Ələkbərovun, parlamentin insan hüquqları daimi komissiyasının sədri, fəlsəfə elmləri doktoru, professor Rəbiyyət Aslanovanın və fəlsəfə elmləri doktoru, professor Səlahəddin Xəlilovun məqalələri toplanmışdır.
Yeni nəşri fərqləndirən cəhətlərdən biri onun oxucuların adət etdikləri standart tərtibdən kənara çıxmasıdır. Burada materiallar 10 bölmə altında toplanmışdır və hər bir bölmə mövzuya uyğun olaraq, Prezident İlham Əliyevin nitq və çıxışlarından iqtibaslarla başlayır və bunun ətrafında müəlliflər öz təhlil və şərhlərini verirlər. Bu materiallarda Azərbaycanda son illər baş verən dinamik dəyişikliklərin mənzərəsi, ölkənin tərəqqisinin vüsəti öz əksini tapmışdır.
Professor Ramiz Mehdiyevin yazdığı geniş “Ön söz”də Prezident İlham Əliyevin respublikaya rəhbərliyinin üç ili ərzindəki fəaliyyətinin başlıca istiqamətləri və nəticələri ümumiləşdirilmiş şəkildə, eyni zamanda, konkret faktlarla oxuculara təqdim olunur. Eyni zamanda, xüsusi vurğulanır ki, Azərbaycanda müstəqil və hüquqi dövlətin, demokratik vətəndaş cəmiyyətinin təməlinin qoyulması, ölkə həyatının bütün sahələrində müasir dövrün tələblərinə uyğun islahatların aparılması, Azərbaycanın beynəlxalq münasibətlərin bərabərhüquqlu subyekti kimi tanınması, regionun lider dövlətləri səviyyəsinə çıxması milli dövlətçiliyin inkişafında birinci strateji mərhələ kimi səciyyələndirilə bilər. Bu isə bilavasitə ümummilli lider Heydər Əliyevin ölkəyə rəhbərliyi dövrü ilə bağlıdır.
2003-cü il oktyabrın 15-də İlham Əliyevin xalqın iradəsi və etimadı ilə Prezident seçilməsindən sonra isə dövlətçiliyimizin inkişafında yeni mərhələ başlandı. Bu, ulu öndərin müəyyənləşdirdiyi milli strategiyanın növbəti konseptual mərhələsinin, Azərbaycanın müasir tarixində İlham Əliyev mərhələsinin başlanğıcıdır. Həmin mərhələnin ötən üç ili ərzində daxili və xarici siyasətdə qazanılmış böyük uğurlar göz qabağındadır və təkcə ölkəmizdə deyil, müxtəlif xarici dairələrdə də açıq-aşkar etiraf edilir. “Ön söz”də vurğulandığı kimi, Prezident İlham Əliyevin uğurlarını təmin edən obyektiv amillərlə yanaşı, onun şəxsi-subyektiv liderlik keyfiyyətləri nəinki inkaredilməzdir, hətta əsas amildir. İlham Əliyev milli ənənələrə, dövlətçilik prinsiplərinə sadiq olan, eyni zamanda, XXI əsrin müasir siyasi məkanına uğurla köklənən, ən müxtəlif siyasi keyfiyyətləri və dəyərləri özündə sintez etməyi bacaran dövlət xadimidir. Ötən üç il ərzində o, nüfuzlu lider, görkəmli siyasətçi kimi özünü ölkədə və xaricdə təsdiq etmişdir. Prezident İlham Əliyevin siyasi xəttinin müxtəlif aspektləri, dövlət idarəetmə metodları beynəlxalq ekspertlər tərəfindən də müsbət qiymətləndirilir və xarici kütləvi informasiya vasitələrinin daim maraq dairəsindədir.
Oxuculara təqdim olunan yeni kitab tariximizin indiki mərhələsinin mənzərəsini əks etdirən real faktların toplandığı bir mənbədir. Xalqımız əmindir ki, Azərbaycanı qüdrətli, zəngin, firavan dövlət qurulmasına doğru aparan bu mərhələ ölkənin yeni liderinin rəhbərliyi ilə hələ uzun müddət davam edəcək və ilbəil daha böyük uğurlarla əlamətdar olacaqdır.
“Azərbaycan” nəşriyatının buraxdığı kitabın tərtibçiləri Elnur Aslanov, Fərhad Məmmədov və Ceyhun Osmanlıdır.
Bölmənin digər xəbərləri
