Azərbaycanın Müstəqillik Günü Batumidə qeyd olunub
Tbilisi, 25 may, AZƏRTAC
Ulu öndər Heydər Əliyevin anadan olmasının 99-cu ildönümü və 28 May - Müstəqillik Günü Batumidə geniş qeyd olunub.
AZƏRTAC xəbər verir ki, Azərbaycanın Batumidəki Baş Konsulluğunun təşkilatçılığı ilə keçirilən tədbirdə əvvəlcə Batumi Dövlət Vokal Ansamblı Azərbaycanın və Gürcüstanın Dövlət himnlərini ifa edib.
Baş konsul Pərviz İsmayılzadə çıxış edərək müasir Azərbaycan Respublikasının 1918-ci ilin may ayından 1920-ci ilin aprel ayınadək mövcud olmuş Azərbaycan Xalq Cümhuriyyətinin (AXC) hüquqi varisi olduğunu diqqətə çatdırıb. Bildirib ki, 1918-ci il mayın 28-də Tbilisidə müsəlman Şərqində ilk demokratik respublikanın yaradılması ilə bağlı Müstəqillik Bəyannaməsi qəbul edilib və cümhuriyyətin özünün parlamenti, hökuməti, ordusu, milli pul vahidi və digər dövlətçilik atributları təsis olunub.
Diplomat qeyd edib ki, bu gün 104 illiyini qeyd etdiyimiz AXC Avropanın əksər ölkələrini qabaqlayaraq müsəlman Şərqində ilk dəfə qadınlara seçki hüququ verib. Cümhuriyyət həm də milli dövlətçilik ənənələrinin bərpasında müstəsna rol oynayıb. Mövcud olduğu 23 ay ərzində Azərbaycan Xalq Cümhuriyyəti çox böyük işlər görüb. 1920-ci ilin aprel işğalınadək AXC-nin müstəqilliyi dünyanın 26 dövləti tərəfindən tanınmış və onlardan 19-u ilə diplomatik münasibətlər qurulmuşdu.
Baş konsul bu il Azərbaycan ilə Gürcüstan arasında diplomatik əlaqələrin qurulmasının 30-cu ildönümünün tamam olması barədə geniş məlumat verib. Bildirib ki, ölkələrimiz arasında “Dostluq, əməkdaşlıq və qarşılıqlı təhlükəsizliyin möhkəmləndirilməsi haqqında” müqavilə Azərbaycan Respublikası və Gürcüstanın Birgə Bəyannamə və ümumilikdə ölkələrimiz arasında ikitərəfli və çoxtərəfli əlaqələrə dair 100-dən çox sənəd imzalanıb.
Bu gün ümummilli lider Heydər Əliyev tərəfindən əsası qoyulmuş siyasəti onun layiqli davamçısı Prezident İlham Əliyev uğurla davam etdirir və ölkəmiz iqtisadi cəhətdən gündən-günə qüdrətlənir, inkişaf edir. Bu gün Azərbaycanda həyata keçirilən uğurlu islahatlar ümummilli lider Heydər Əliyevin uzaqgörən siyasətinin məntiqi davamıdır.
Baş konsul Prezident İlham Əliyevin gərgin və səmərəli fəaliyyəti nəticəsində Azərbaycan BMT Təhlükəsizlik Şurasının qətnamələrini yerinə yetirərək, Azərbaycan Müzəffər Ordusu rəşadət, qəhrəmanlıq, peşəkarlıq göstərərək öz gücü ilə torpaqlarını işğaldan azad etdiyini qeyd edib.
P.İsmayılzadə, iki tərəfdaş ölkə olan Azərbaycan ilə Gürcüstanın əsrlər boyu dostluq və qardaşlıq münasibətlərində yaşadığını, bir-birinə yaxından kömək göstərdiyini, sevincli və kədərli anlarında həmişə bir-birinə dəstək olduğunu vurğulayıb.
Ölkələrimiz arasında azad ticarət zonası yaradılıb və Azərbaycan Gürcüstanın əsas iri ticari-iqtisadi tərəfdaşıdır. Azərbaycan şirkətləri Gürcüstana böyük investisiyalar yatırıb. Gürcüstan iqtisadiyyatına yatırılan Azərbaycan investisiyalarının həcmi 1,2 milyard dollar təşkil edir və SOCAR-ın fəaliyyəti sayəsində Gürcüstanda qazlaşdırma səviyyəsi 90 faizə çatdırılıb. Gürcüstan üzrə SOCAR-ın 108 yanacaqdoldurma məntəqəsi fəaliyyət göstərir ki, bunlardan 10-u Acarıstan ərazisindədir. Acarıstan Muxtar Respublikasında fəaliyyət göstərən “SOCAR Energy Georgia” şirkəti tərəfindən Batumi və Kobuleti şəhərləri, Xalvaçaur və digər regionların qazla təmin olması 110 mindən çox abunəçiyə xidmət göstərir.
Eyni zamanda, Gürcüstan iqtisadiyyatına yatırılan investisiyalar sırasında Acarıstan ərazisində fəaliyyət göstərən “Qara Dəniz Neft” Kulevi terminalı neft məhsullarının Xəzəryanı ölkələrdən Avropa ölkələrinə çatdırılmasında xüsusi rol oynayır.
Acarıstan Muxtar Respublikası Hökumətinin maliyyə və iqtisadiyyat naziri Jaba Putkaradze Müstəqillik Günü və Ulu Öndərin anadan olmasının 99-cu ildönümü münasibətilə Azərbaycan xalqını təbrik edib. O, müstəqillik gününün bütün ölkələr üçün vacib bayram olduğunu və böyük məmnuniyyətlə bu bayramı Azərbaycan xalqı ilə bölüşdüyünü qeyd edib. Müstəqillik illəri göstərdi ki, Gürcüstan və Azərbaycanın qarşılıqlı dəstəyə ehtiyacları var, çünki mövcud olan mürəkkəb siyasi və iqtisadi şəraitdə ancaq qarşılıqlı yardım və əməkdaşlıq vasitəsilə çətinliklərin aradan qaldırılması mümkün olmuşdur. Gürcüstan və Azərbaycan arasında mövcud olan strateji əməkdaşlıq çoxəsrlik tarixi dostluq və qonşuluq əlaqələri əsasında qurulub.
J.Putkaradze qeyd edib ki, Acarıstan turizm, biznes və humanitar əlaqələr sahəsində Gürcüstan-Azərbaycan münasibətlərinin möhkəmlənməsində fəal rol oynayır.
Tədbirdə Türkiyə Respublikasının Batumi şəhərindəki Baş konsulu çıxış edərək, ulu öndər H.Əliyevin anadan olmasının 99-cu ildönümü və 28 May - Müstəqillik Günü münasibətilə Azərbaycan xalqına və tədbir iştirakçılarına təbriklərini çatdırıb.
Rəsmi çıxışlardan sonra ulu öndər Heydər Əliyevin və Eduard Şeverdnadzenin həyat və fəaliyyətindən bəhs edən sənədli film nümayiş etdirilib.
Tədbir Baş Konsulluğun nəzdində fəaliyyət göstərən “Bazar Günü” məktəbinin şagirdlərinin çıxışları ilə davam edib. Şagirdlər ulu öndər Heydər Əliyevə və Müstəqillik Gününə həsr edilmiş şeirlər oxuyub, “Fəxr edirəm ki, Azərbaycanlıyam” mahnısını ifa etmişlər və dünyaya öz sülh mesajlarını tədbirdə sərgilənən boya ilə çəkdikləri şəkillərlə çatdırıb.
Mərasimdə Acarıstan MR Hökumətinin maliyyə və iqtisadiyyat naziri Jaba Putkaradze, təhsil naziri Maiya Xajiaşvili, səhiyyə naziri Nino Nijaradze, Ali Məclisin deputatı İliya Vercadze, kənd təsərrüfatı nazirinin müavini İrma Apxazava, Batumi şəhər meri Arçil Çokovani, Türkiyə və İranın baş konsulları, Acarıstan MR-in Turizm şöbəsinin rəhbəri Tinatin Zoidze, Kulevi QDT-nin rəhbəri və əməkdaşları, SOCAR-ın Acarıstan nümayəndəliyinin rəhbəri, M.F.Axundov adına Gürcüstan-Azərbaycan Xeyriyyə Cəmiyyətinin və “Əli və Nino” adına Gürcüstan-Azərbaycan Sosial Mədəni İnkişaf Mərkəzinin üzvləri, Azərbaycan və gürcü ictimaiyyətinin nümayəndələri, Batumidə yaşayan soydaşlarımız və KİV nümayəndələri iştirak ediblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
