AZƏRBAYCANIN ÖTƏN İL XARİCİ TİCARƏT DÖVRİYYƏSİ 7,1 MİLYARD DOLLAR OLMUŞDUR
Dövlət Statistika Komitəsindən AZƏRTAC-a bildirmişlər ki, 2004-cü ildə Azərbaycanın xarici ticarət dövriyyəsinin ümumi həcmi 7,1 milyard ABŞ dolları olmuşdur. Aparılan əməliyyatlarda ixrac 3,6 milyard, idxal isə 3,5 milyard dollar təşkil etmiş, ölkə üzrə 110 milyon dollarlıq müsbət xarici ticarət saldosu yaranmışdır.
İdxal-ixrac əməliyyatlarının 42,4 faizi Avropa Birliyi, 25,5 faizi MDB ölkələri, 32,1 faizi isə digər tərəfdaşlarla həyata keçirilmişdir. Ümumi dövriyyənin 61,1 faizi Avropa, 35,5 faizi Asiya, 2,7 faizi Amerika, 0,5 faizi Afrika qitəsi dövlətlərinin, 0,2 faizi isə Okeaniyanın payına düşmüşdür.
Bu müddətdə ölkə ərazisində fəaliyyət göstərən hüquqi və fiziki şəxslər dünyanın 119 ölkəsi ilə qarşılıqlı faydalı ticarət əlaqələri qurmuşlar. Onların apardıqları ticarət əməliyyatlarının 80 faizindən çoxu İtaliya, Rusiya, Birləşmiş Krallıq, Türkiyə, İsrail, Türkmənistan, Qazaxıstan, Almaniya, Gürcüstan, İran, Ukrayna, Çin, Fransa, Niderland, ABŞ və İndoneziya ilə olmuşdur.
Bölmənin digər xəbərləri
