AZƏRBAYCANIN OTÜSTÜ XOKKEY ÜZRƏ YIĞMA KOMANDASI ÇİN XOKKEYÇİLƏRİNƏ MƏĞLUB OLMUŞDUR
AZƏRTAC xəbər verir ki, iyunun 9-də Bakı Otüstü Xokkey Kompleksində qadınlardan ibarət otüstü xokkey komandaları arasında “AtaHoldinq Çelenc Xokkey” beynəlxalq turniri başlanmışdır.
Yarışların təntənəli açılışı mərasimində Azərbaycanın dövlət himni səsləndirilmişdir.
Tədbirdə gənclər və idman nazirinin müavini İsmayıl İsmayılov, Azərbaycan Otüstü Xokkey Federasiyasının vitse-prezidenti Namiq Əliyev və turnirin direktoru Şella Morroy çıxış edərək, bütün iştirakçılara uğurlar arzulamışlar.
Vurğulanmışdır ki, son illər Azərbaycanda bütün sahələrdə olduğu kimi, idmanda da böyük irəliləyiş baş vermiş, ölkəmizdə bir çox beynəlxalq yarışlar yüksək səviyyədə keçirilmişdir. Prezident İlham Əliyevin göstərişi ilə son illər ərzində respublikamızın bir çox bölgələrində on iki Olimpiya-İdman Kompleksinin tikilməsini diqqətə çatdıran natiqlər, bu rəqəmin cari ildə iyirmiyə çatdırılacağını vurğulamışlar.
Qeyd olunmuşdur ki, dünya reytinqində ikinci altılıqda qərarlaşan bu komandaların mübarizəsində qalib yığma komandalar dünya
kuboku uğrunda yarışlara vəsiqə qazanacaqlar. Yarışa ciddi hazırlaşan yığmamızın reytinq xalını yüksəldəcəyinə inam ifadə olunmuşdur.
Gənc ifaçıların konsert proqramından sonra beynəlxalq turnir start götürmüşdür.
Azərbaycan yığması ilk görüşdə Çin millisinə 0:2 hesabı ilə uduzmuşdur.
Digər oyunda Koreya Respublikasının xokkeyçiləri ABŞ yığmasının qapısından iki cavabsız top keçirmişlər.
Yeni Zelandiya-İngiltərə millilərinin mübarizəsində isə ikinci komanda qələbə qazanmışdır. Həmin oyunda 1:0 hesablı nəticə qeydə alınmışdır.
Bölmənin digər xəbərləri
