AZƏRBAYCANIN QARSDAKI BAŞ KONSULU ERMƏNİLƏRİN TƏKLİFİNİ RƏDD ETMİŞDİR
AZƏRTAC-ın xüsusi müxbiri xəbər verir ki, Azərbaycanın Qarsdakı baş konsulu Həsən Zeynalov Ermənistanın Gümrü şəhərindəki “Qafqaz Mərkəzi”nin sədri Artuş Mkrtçyanın görüşmək barədə təklifini rədd etmişdir.
Diplomatımız keçirdiyi mətbuat konfransında bildirmişdir ki, erməni nümayəndəsi gürcü və qarslı heyvandarlıq məhsulları istehsalçıları ilə birlikdə istehsal etdikləri “Qafqaz pendiri”ni tanıtmaq istədiklərini bildirmişdir.
Həsən Zeynalov “Qafqaz mərkəzi” adlanan bu qeyri-hökumət təşkilatının başında da bir erməninin durduğunu qəribə hal olduğunu dilə gətirərək demişdir: “Bu qondarma sülh mərkəzinin sədrindən soruşmaq lazımdır; Qafqazda sülhü pozan dövlət hansıdır? Ermənistan Azərbaycan torpaqlarını işğal etmişdir və Türkiyədən də ərazi tələb edir. Ermənilər mesheti türklərinin çoxluq təşkil etdiyi Gürcüstanın müxtəlif ərazilərinə də torpaq iddiaları irəli sürürlər. Belə olan halda, Ermənistan necə Qafqazda sülhə vasitəçilik edə bilər? Bunu anlamaq mümkün deyildir. Bu oyunların əsas məqsədlərindən biri Türkiyə-Azərbaycan qardaşlığına kölgə salmaqdır. Bakı-Tbilisi-Qars dəmiryolu xəttinin təməlinin qoyulacağı və Bakı-Qars reysi ilə birbaşa uçuşların təşkil olunacağı bu günlərdə ermənilər də öz təxribatlarını gücləndirməkdədirlər. Hər kəs çox yaxşı bilməlidir ki, Türkiyə-Azərbaycan münasibətləri qardaşlıq, dostluqdan daha çox mühüm olan milli birliyə söykənməkdədir”.
