Azərbaycanın Qırğızıstandakı səfiri Bişkek televiziyasının qonağı olub
Bişkek, 6 iyul, АZƏRTAC
Azərbaycanın Qırğızıstandakı səfiri Hidayət Orucov Bişkekdəki “Piramida” televiziya kanalının “Elçi” verilişinin qonağı olub.
H.Orucov telekanala müsahibəsində ulu öndər Heydər Əliyevin müstəqil Azərbaycan dövlətçiliyinin möhkəmləndirilməsi istiqamətində müstəsna xidmətlərindən danışıb. Bildirib ki, türk dünyasının ən böyük şəxsiyyətlərindən biri olan Heydər Əliyev türkdilli ölkələrlə qardaşlıq münasibətlərinin yaranması üçün əvəzsiz işlər görüb. Mərkəzi Asiya, o cümlədən Qırğızıstanla qarşılılıqlı sıx əməkdaşlığın inkişafı Heydər Əliyevin xarici siyasətinin prioritet istiqamətlərindən olub.
Səfir böyük dövlət xadimi Heydər Əliyevin qırğız xalqına xüsusi diqqət və məhəbbət ilə yanaşdığını diqqətə çatdıraraq deyib: “Ulu öndər Heydər Əliyev deyirdi ki, Manasın dili - bizim ümumi dilimizdir. Biz kökü bir, dili bir olan xalqlarıq”.
Çingiz Aytmatovla bağlı sualı isə diplomat belə cavablandırıb: “Mənim şəxsi fikrimdir ki, iyirminci əsrin ikinci yarısında türk dünyası bəşəriyyətə iki böyük insan bəxş edib. Dünya siyasətində - Heydər Əliyevi və dünya ədəbiyyatında - Çingiz Aytmatovu”.
Səfir, həmçinin bildirib ki, Çingiz Aytmatov Azərbaycanı çox sevirdi və Bakıya bir neçə dəfə səfər etmişdi. 2008-ci ildə baş tutmuş son səfəri zamanı o, Prezident İlham Əliyev tərəfindən qəbul edilərək Azərbaycan və Qırğızıstan arasında qarşılıqlı əlaqələrin möhkəmləndirilməsi sahəsindəki xidmətlərinə görə “Dostluq” ordeni ilə təltif olunmuşdu. Heydər Əliyev onun yaradıcılığını yüksək qiymətləndirirdi. Çingiz Aytmatov isə yazı və müsahibələrində Heydər Əliyevin türk dünyasının qüdrətli lideri olduğunu dönə-dönə vurğulayırdı. Çingiz Aytmatovun, demək olar, bütün əsərləri Azərbaycan dilinə tərcümə edilərək dəfələrlə çap olunub, ali və orta təhsil məktəblərinin tədris proqramlarına salınıb.
H.Orucov məlumat verib ki, Azərbaycan Prezidenti İlham Əliyevin göstərişi ilə 2013-cü ildə Bakıda Çingiz Aytmatovun 85 illiyi ilə bağlı kitab nəşr olunub və həmin il dekabr ayının 18-də Azərbaycan Dövlət Akademik Milli Dram Teatrında yubiley gecəsi keçirilib. Həmin tədbirdə Qırğız Respublikasının mədəniyyət, informasiya və turizm nazirinin birinci müavini Akimbek Tekeşovun başçılığı ilə nümayəndə heyəti də iştirak edib.
Azərbaycan Prezidenti İlham Əliyevin rəhbərliyi və təşəbbüsü ilə həyata keçirilən iqtisadi islahatlardan danışan səfir bildirib ki, dünyanın aparıcı energetika şirkətləri tərəfindən ölkəmizin neft və qaz sektoruna investisiyaların yatırılmasına nail olunub. Bunun nəticəsində enerji amilindən, habelə islahatlar və karbohidrogen ehtiyatlarının satışından əldə edilən aktivlərin insan kapitalına investisiya qismində yatırılması Azərbaycana iqtisadiyyatı şaxələndirmək imkanını yaradır.
Diplomat xüsusi vurğulayıb ki, Azərbaycan Prezidenti İlham Əliyevin və Qırğızıstanın dövlət başçısı Almazbek Atambayevin rəhbərliyi ilə ölkələrimiz arasında əməkdaşlıq, dostluq və qardaşlıq münasibətləri genişlənir. Bu da ikitərəfli əməkdaşlığın dinamik inkişafına əlavə təkan verir. Azərbaycan və Qırğızıstan xalqları qardaş xalqlardır və ölkələrimiz arasında münasibətlər davamlı olaraq inkişaf etməkdədir.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
