AZƏRBAYCANIN TƏCRÜBƏSİ BAŞQA ÖLKƏLƏRƏ FAYDALI OLA BİLƏR
AZƏRTAC-ın xüsusi müxbiri xəbər verir ki, Dünya Bankının Parisdəki ofisində Hasilat Sənayesində Şəffaflıq Təşəbbüsünün (HŞT) həyata keçirilməsi ilə bağlı problemlərə və 2005-ci ilin martında Londonda HŞT üzrə keçiriləcək ikinci beynəlxalq zirvə toplantısına həsr olunmuş beynəlxalq konfrans başa çatmışdır.
Azərbaycan Dövlət Neft Fondunun icraçı direktoru, HST üzrə hökumət komissiyasının sədri Samir Şərifov konfransda iştirak etmişdir. Hasilat sənayesi sahəsində zəngin təcrübəyə malik ölkələrin, Dünya Bankının, Beynəlxalq Valyuta Fondunun, Avropa Yenidənqurma və İnkişaf Bankının, inkişaf etmiş ölkələrin rəsmilərinin, habelə hasilat sənayesi ilə məşğul olan transmilli şirkətlərin, hasilat sənayesində şəffaflığın təmin edilməsi sahəsində fəaliyyət göstərən və beynəlxalq aləmdə tanınan qeyri-hökumət təşkilatları nümayəndələrinin iştirak etdikləri konfransda HST-nin həyata keçirilməsində bir çox ölkələrin əldə etdikləri zəngin təcrübə ətrafında fikir mübadiləsi aparılmışdır.
Müzakirə zamanı çıxış etmiş Samir Şərifov 2003-cü il iyunun 17-də Londonda HŞT üzrə birinci beynəlxalq konfransda Azərbaycanın bu təşəbbüsə qoşulması ilə bağlı hökumətin üzərinə düşən öhdəliklərin yerinə yetirilməsini təmin etmək məqsədi ilə Prezident İlham Əliyevin göstərişinə əsasən yaradılmış komissiyanın bir il ərzindəki fəaliyyəti, əldə etdiyi nailiyyətlər, bu işdə hökumət nümayəndələrinin, neft və qaz sektorunda fəaliyyət göstərən yerli və xarici şirkətlərin, qeyri-hökumət təşkilatlarının iştirakı barədə ətraflı məlumat vermiş, HŞT-ni həyata keçirən pilot ölkə kimi Azərbaycanın təcrübəsinin digər dövlətlər üçün də faydalı ola biləcəyini xüsusi vurğulamışdır.
Dövlət Neft Fondunun icraçı direktoru 2005-ci ilin martında Londonda HŞT üzrə keçiriləcək ikinci beynəlxalq zirvə toplantısına hazırlıqla bağlı Fransa Xarici İşlər Nazirliyində aparılmış məsləhətləşmələrdə də iştirak etmişdir.
Bölmənin digər xəbərləri
