AZƏRBAYCANIN TƏQDİM ETDİYİ FAKTLAR SÜBUT OLUNMUŞDUR
Azərbaycanın işğal olunmuş ərazilərində Ermənistan tərəfindən əhalinin məskunlaşdırılmasını araşdırmış ATƏT-in faktaraşdırıcı qrupuna ölkəmizin təqdim etdiyi faktlar sübut olunmuşdur.
Bunu AZƏRTAC-a xarici işlər nazirinin müavini Araz Əzimov bildirmişdir. O demişdir ki, artıq birinci mərhələ başa çatmışdır və toplanan məlumatlar təhlil olunduqdan sonra hesabat hazırlanacaqdır. Hesabat ATƏT-in Minsk qrupuna və təşkilatın daimi şurasına təqdim olunacaq və burada müzakirələrdən sonra ona siyasi-hüquqi qiymət veriləcəkdir.
Araz Əzimov Ermənistan tərəfinin həmin ərazilərdə məskunlaşdırılan erməni ailələrinin vaxtilə Azərbaycandan köçənlərdən ibarət olması iddialarına cavabında bildirmişdir ki, 1949-cu ildə qəbul olunmuş Cenevrə Konvensiyasına görə işğal olunmuş ərazilərə əhalinin köçürülməsi heç bir halda yolverilməzdir. İşğal edən tərəf həmin ərazilərdə heç bir demoqrafik dəyişiklik apara bilməz.
“Azərbaycanın işğal olunmuş ərazilərində yerləşdirilən erməni ailələri də məhz işğaldan sonra orada məskunlaşdırılmışdır. Bu, beynəlxalq humanitar hüququn pozulması deməkdir” fikrini xüsusi vurğulayan xarici işlər nazirinin müavini Ermənistanın bu iddialarının əsassız olduğunu bildirməklə, onların ciddi qəbul edilməyəcəyini söyləmişdir.
Bölmənin digər xəbərləri
