Azərbaycanın Türk dünyası ilə münasibətlərinin inkişafında yeni imkanlar yaranır
Bakı, 15 sentyabr, AZƏRTAC
Azərbaycanın xarici siyasətində Türk dünyası, həmçinin Mərkəzi Asiya ölkələri ilə əməkdaşlıq xüsusi yer tutur. Bu baxımdan dövlətimizin başçısı İlham Əliyevin sentyabrın 14-də Tacikistana səfəri, Düşənbədə Mərkəzi Asiya Dövlət Başçılarının 5-ci Məşvərət görüşündə fəxri qonaq qismində iştirakı hazırda ölkə və dünya mətbuatında geniş müzakirə olunan mövzular sırasındandır. Prezident İlham Əliyevin tədbirə fəxri qonaq qismində dəvəti Azərbaycan-Tacikistan əlaqələrinin bugünkü inkişaf səviyyəsinin, həmçinin liderlərin şəxsi münasibətlərinin ölkələrimiz arasında əməkdaşlığın yeni istiqamətlər üzrə daha da möhkəmlənməsində rolunun aydın mənzərəsini yaradır. Ümumilikdə tarixi Zəfərimiz Türk dünyası ölkələri arasında coğrafi bağlantını təmin etmək üçün gözəl imkan yaradıb. 2020-ci il noyabrın 10-da imzalanan üçtərəfli Bəyanatda Zəngəzur dəhlizinin açılması ilə bağlı müddəanın yer alması və onun yerinə yetirilməsi türk dövlətlərini coğrafi baxımdan da bir-birinə bağlayacaq, Şərqdən Qərbə uzanan vahid marşrut xəttini formalaşdıracaq ki, bu da böyük bir coğrafiyada yüklərin rahatlıqla, qısa zaman kəsiyində daşınmasına böyük töhfə verəcək. Prezident İlham Əliyev sözügedən tədbirdəki çıxışında Azərbaycanın nəqliyyat imkanlarından, əlaqələrin daha da möhkəmlənməsi üçün hədəflərdən bəhs etdi. Bildirdi ki, Mərkəzi Asiya və Azərbaycan artan iqtisadiyyatı, demoqrafiyası və geosiyasi potensialı ilə dünya siyasətində strateji əhəmiyyətə malik olan vahid tarixi-mədəni coğrafi regiondur. Azərbaycan Mərkəzi Asiya ölkələri üçün Türkiyə və Avropa bazarları istiqamətində etibarlı tranzit ölkəsidir. Şərq-Qərb marşrutu ilə yükdaşımalarına artan tələbatı təmin etmək məqsədilə Bakı-Tbilisi-Qars dəmir yolu müasirləşdirilir. Buna paralel olaraq, Bakı Ticarət Limanının imkanları bugünkü 15 milyon tondan 25 milyon tona qədər artırılır.
Bu fikirləri AZƏRTAC-a açıqlamasında Milli Məclisin deputatı Əliabbas Salahzadə səsləndirib.
Qarşılıqlı səfərlərin, imzalanan sənədlərin əlaqələrin inkişafında stimulverici amil olduğunu diqqətə çatdıran deputat deyib: “Prezident İlham Əliyev Tacikistana səfərinin əlaqələrimizin daha da möhkəmlənəcəyinə xidmət edəcəyini bildirdi. Həmçinin Tacikistan Prezidentinin Azərbaycana dövlət səfərini səbirsizliklə gözlədiyini vurğuladı. Dövlətimizin başçısının çıxışında yer alan fikirlərin hər biri Azərbaycanın xarici siyasətində ikitərəfli və beynəlxalq təşkilatlar çərçivəsində əməkdaşlığa, ümumilikdə hədəflərə doğru birgə addımlamağa nə qədər böyük önəm verdiyini göstərdi. Azərbaycan hər zaman dünyaya birlik, həmrəylik, əməkdaşlıq mesajını ünvanlayır. Prezident İlham Əliyevin “Bu il BMT-nin Mərkəzi Asiya Ölkələrinin İqtisadiyyatları üçün Xüsusi Proqramı - SPECA-nın yaradılmasının 25 ili tamam olur. Mən dəyərli dövlət başçılarına rəsmi dəvətləri göndərmişəm və bu ilin noyabrında Bakıda Sammitdə sizi görməkdən məmnun olaram” fikirləri özündə bu məqamları aydın şəkildə ifadə edir”.
Ə.Salahzadə Azərbaycanla Mərkəzi Asiya ölkələri arasında əlaqələrin inkişafında yeni imkanların açıldığını önə çəkərək bildirib ki, regional inkişafın aparıcı qüvvəsinə, Avropanın enerji təhlükəsizliyinin təminatçısına çevrilən Azərbaycan Şərqlə Qərb arasında, o cümlədən Mərkəzi Asiya ölkələri üçün mühüm tranzit ölkə və etibarlı tərəfdaşdır. Ölkəmizin yerləşdiyi coğrafi məkan onun dövlətlər, xalqlar arasında körpü rolunu oynamasında stimulverici amildir. Dövlətimizin başçısı İlham Əliyev hər bir çıxışında, səfərlərində Azərbaycanın bu sahədə mövcud imkanlarından geniş bəhs edərək, əməkdaşlıq körpüsünü birgə səylərimiz nəticəsində daha da möhkəmləndirməyin vacibliyini bildirir. Ölkəmizin beynəlxalq əlaqələri bundan sonra daha da genişlənəcək, Şərqlə Qərb arasında mühüm tranzit ölkə, Avropanın etibarlı enerji təchizatçısı kimi önəmli rolu davam edəcək. Azərbaycanın artan tranzit imkanları, həmçinin Mərkəzi Asiya ölkələrinin, həmin coğrafiyada yerləşən türk dövlətlərinin inkişafına da müsbət təsirini göstərəcək.
Deputat Azərbaycanın Türk dünyasının birliyi istiqamətində atdığı davamlı addımlardan da bəhs edərək bildirib: “Azərbaycan və Türkiyə bu birliyə verdiyi töhfələri ilə diqqətdədir. Dövlətimizin başçısı İlham Əliyevin 2021-ci ildə, Türkiyə Prezidenti Rəcəb Tayyib Ərdoğanın ötən il Türk Dünyasının Ali Ordeninə layiq görülmələri də bunun bariz nümunəsidir. Hər zaman bir-birinin yanında olan iki dost, qardaş ölkənin münasibətləri tarixi Zəfərimizdən sonra imzalanan Şuşa Bəyannaməsi ilə yeni mərhələyə qədəm qoyub”.
Bu gün, həm də Bakının yadelli qüvvələrdən azad edilməsinin 105 ilinin tamam olduğunu xatırladan Əliabbas Salahzadə diqqətə çatdırıb ki, tariximizin bu mühüm səhifəsi Azərbaycan-Türkiyə münasibətlərinin dünəninə, bu gününə və gələcəyinə bir daha nəzər salmağı zərurətə çevirir. 1918-ci il sentyabrın 15-də Azərbaycan və Osmanlı əsgərləri Bakını bolşevik-daşnak işğalından azad edərək Azərbaycan dövlətinin tarixinə şərəfli gün yazıblar. Osmanlı ordusu Bakının azad olunması üçün həyata keçirdiyi hərbi əməliyyatlarda 1132 şəhid verib. Türkiyə Prezidenti Rəcəb Tayyib Ərdoğan Bakının azad edilməsinin 100 illiyinə həsr olunan hərbi paraddakı çıxışında bu məqamı böyük qürur hissi ilə qeyd etmişdir ki, Azərbaycanın müstəqilliyi üçün canlarını fəda edən bütün şəhidlərimiz fədakarlıqları və cəsarətləri ilə özlərindən sonra nəsildən-nəslə qürurla xatırlanacaq şanlı bir dastan yazaraq, Türkiyə və Azərbaycanın əbədi qardaşlığının da rəmzi oldular. Türkiyə dünyanın 34 ölkəsində 78 şəhid məzarlığı olan bir ölkədir. Azərbaycan Türkiyədən sonra ən çox şəhidi olan ölkədir. Türkiyə və Azərbaycan tarixi, mədəniyyəti, dili, dini bir, iki qardaş ölkədir.
Bölmənin digər xəbərləri
