AZƏRBAYCANIN XARİCİ İŞLƏR NAZİRİ ABŞ DÖVLƏT DEPARTAMENTİNİN NÜMAYƏNDƏSİ İLƏ GÖRÜŞMÜŞDÜR
Azərbaycanın xarici işlər naziri Elmar Məmmədyarov fevralın 8-də ABŞ Dövlət Departamentinin Avropa və Avrasiya ölkələrinə yardım üzrə əlaqələndiricisi səfir Tom Adams ilə görüşmüşdür.
Xarici İşlər Nazirliyinin mətbuat mərkəzindən AZƏRTAC-a bildirmişlər ki, səfir Tom Adams Azərbaycana səfərindən məmnun olduğunu bildirmişdir. O demişdir ki, ikitərəfli iqtisadi əməkdaşlıq qrupunun Bakıda keçiriləcək və bir sıra mühüm məsələləri müzakirə edəcək görüşündə iştirak etmək üçün may ayında yenidən Azərbaycana gələcəkdir.
Azərbaycan ilə ABŞ arasında ikitərəfli münasibətlərin uğurla inkişaf etdiyini diqqətə çatdıran nazir Elmar Məmmədyarov, ölkəmizdə demokratikləşmə, vətəndaş cəmiyyəti qurulması, kiçik və orta sahibkarlığın inkişafı, təhsilin dünya standartlarına uyğunlaşdırılması istiqamətində görülən işlərdən danışmışdır.
Tərəflər Azərbaycanın Dünya Ticarət Təşkilatına qoşulması məsələsinə toxunaraq ölkəmizin daha sürətli iqtisadi inkişafı ilə bağlı fikir mübadiləsi aparmışlar.
Görüşdə qarşılıqlı maraq doğuran digər məsələlər də müzakirə edilmişdir.
Bölmənin digər xəbərləri
