AZƏRBAYCANLA ÇEXİYA ARASINDA SİYASI MÜNASİBƏTLƏR YÜKSƏK SƏVİYYƏDƏDİR
Xarici İşlər Nazirliyinin mətbuat xidmətindən AZƏRTAC-a bildirmişlər ki, iyulun 4-də nazir Elmar Məmmədyarov Azərbaycanda rəsmi səfərdə olan Çexiyanin xarici işlər naziri Karel Şvartsenberq ilə görüşmüşdür.
Nazir E.Məmmədyarov Azərbaycan ilə Çexiya arasında siyasi münasibətlərin yüksək səviyyəsini vurğulamış, iqtisadi əlaqələrin genişləndirilməsi üçün böyük imkanların mövcud olduğunu qeyd etmişdir.
E.Məmmədyarov Azərbaycanın Avropaya və Avratlantik strukturlara inteqrasiyaya səy göstərdiyini bildirmiş, Çexiyanın Avropa İttifaqı və NATO-nun üzvü kimi rolunun vacibliyini vurğulamışdır.
K.Şvartsenberq Bakının inkişafından valeh olduğunu bildirmiş və Azərbaycanın tərəqqisini yüksək qiymətləndirmişdir. Çexiyalı nazir ölkələrimiz arasında münasibətləri strateji tərəfdaşlıq adlandıraraq, enerji təhlükəsizliyi, Avropaya və Avratlantik qurumlara inteqrasiyasının vacibliyini vurğulamışdır.
Çexiyanın xarici işlər naziri ölkəsinin Ermənistan-Azərbaycan, Dağliq Qarabağ münaqişəsinin sülh yolu ilə, Azərbaycanın ərazi bütövlüyü çərçivəsində həllini dəstəklədiyini bildirmişdir.
E.Məmmədyarov Çexiyanın ölkəmizin ərazi bütövlüyünə verdiyi dəstəyə görə təşəkkürünü bildirmiş, Ermənistan-Azərbaycan, Dağlıq Qarabağ münaqişəsinin nizamlanması ilə bağlı Azərbaycanın mövqeyinə dair ətraflı məlumat vermişdir.
Görüşdən sonra nazirlər Azərbaycan ilə Çexiya xarici siyasət idarələri arasında məsləhətləşmələrə dair Anlaşma Memorandumu imzalamışlar.
######
Bölmənin digər xəbərləri
