Azərbaycanlı deputat AŞPA-da gender bərabərsizliyinin aradan qaldırılmasında təhsilin rolundan danışıb
Strasburq, 26 yanvar, AZƏRTAC
Xəbərlərdə bütün dünyada qadınlara və qızlara qarşı zorakılıq, analara bənzəyən uşaqlar, eləcə də erkən evliliyə dair yazılarla qarşılaşırıq. Etika sahəsində, ümumiyyətlə, bütün cəmiyyətdə bu mövzu insan hüquqları məsələsi olaraq tanınmalıdır. Bu cür zorakılığın qarşısını almaq üçün birləşməliyik.
AZƏRTAC xəbər verir ki, bu fikirləri AŞPA-da Azərbaycan nümayəndə heyətinin üzvü Fazil Mustafa qurumun qış sessiyasında “Qadınlara, qızlara qarşı gender əsaslı zorakılığın dayandırılmasında kişilərin, oğlanların rolu və məsuliyyəti” adlı məruzənin müzakirələri zamanı çıxışında deyib.
Bildirilib ki, kişilərin, oğlanların qadınlara, qızlara qarşı zorakılığını dayandırmaq, habelə bu mübarizəyə təşviq etmək məqsədi ilə konkret təkliflər vermək üçün Assambleyanın rolunu və məsuliyyətini həll etmək vaxtıdır. Kişilər qadınlara qarşı zorakılığın bir hissəsi olduğu kimi, həll yolunun da bir hissəsi olduqlarını başa düşməlidirlər.
“Bu sahədə kişilər müsbət rol oynaya, həmyaşıdları arasında təsirlərindən istifadə edə, həmçinin zərərli təcrübələrə qarşı çıxa bilərlər. Gender bərabərliyi təhsili şiddətdən azad bir cəmiyyətin əsasını təşkil edir. Hər kəs, daha çox da kişilər gender bərabərliyi uğrunda və cinslərə əsaslanan zorakılığa qarşı mübarizədə müttəfiq və tərəfdaş olmalıdırlar”,- deyə F. Mustafa qeyd edib.
Vurğulanıb ki, erkən yaşdan, həmçinin məktəbdən başlayaraq gender bərabərliyi təhsili üzərində işləmək prioritet olmalıdır. Təhsil uzunmüddətli dəyişikliyin açarlarından biridir və şiddətdən azad bir cəmiyyətin təməlidir.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
