Azərbaycanlı deputat gender bərabərsizliyinin aradan qaldırılmasına dair AŞPA-da təkliflər irəli sürüb
Strasburq, 26 yanvar, AZƏRTAC
Azərbaycanda məişət zorakılığının qarşısının alınması və qadınların hüquqlarının müdafiəsi üçün davamlı tədbirlər həyata keçirilir. 2006-cı ildə “Qadın və kişilərin bərabər hüquqlarının dövlət təminatı haqqında” qanun qəbul edilib və gender bərabərliyinin hüquqi əsasını qoyan “Qadınlara qarşı ayrı-seçkiliyin bütün formalarının ləğv edilməsi haqqında Konvensiya” ratifikasiya edilib.
AZƏRTAC xəbər verir ki, bu fikirləri AŞPA-da Azərbaycan nümayəndə heyətinin üzvü Könül Nurullayeva qurumun qış sessiyasında “Qadınlara və qızlara qarşı gender əsaslı zorakılığın dayandırılmasında kişi və oğlanların rolu və məsuliyyəti” adlı məruzənin müzakirələri zamanı çıxışında deyib. Bildirib ki, sivil lider olan və ya daha yaxşı bir məqsədlər üçün qərar verən şəxslər konstruktiv nümunələr təqdim edə bilər. Onlar zorakılığa haqq qazandıran münasibət və hərəkətləri aradan qaldırmaq üçün hərəkətə keçə bilərlər. K. Nurullayevanın sözlərinə görə, gender bərabərsizliyi və gender əsaslı zorakılıq haqqında ictimaiyyəti daim məlumatlandırmaq, bu sahədə reallaşdırılan düzgün siyasət problemin həllinə kömək edə bilər.
“Bu məsələnin həlli üçün ilkin olaraq milli səviyyədə bərabər rəftar qaydaları tətbiq edilməlidir. Məcburi nikah məsələsi hesabatlarda və qərarlarda, eləcə də ictimaiyyətin maarifləndirilməsinin artırılması yolu ilə gündəmə gətirilməlidir. Dövlətlər evlilik məcburiyyətindən azad etmək üçün yurisdiksiyalarını genişləndirməlidir. Eyni zamanda, səlahiyyətli orqanların boşanmaya mane olan tərəfi cərimələməsi, buna mane olan həyat yoldaşlarına qarşı məhkəmə işinin aparılmasını mümkün edə bilər”,-deyə K. Nurullayeva qeyd edib.
Strasburq
Bölmənin digər xəbərləri
