Bakı, 20 iyul, AZƏRTAC

Hazırda Honq Konq Universitetində (HKU) mexanika mühəndisliyi ixtisası üzrə təhsil alan, eyni zamanda, Azərbaycan Hava Yollarının (AZAL) Hava Gəmilərinin Uçuş Yararlılığının Saxlanılması İdarəsində yay təcrübə proqramında iştirak edən azərbaycanlı tələbə Yusuf Kərimli təhsil həyatı, Honkonqdakı fəaliyyəti, AZAL-da qazandığı mühəndislik təcrübəsi və gələcək hədəfləri barədə AZƏRTAC-ın suallarını cavablandırıb.

- Yusuf bəy, əvvəlcə özünüz haqqında bir qədər məlumat verərdiniz.

- Hazırda Honq Konq Universitetində mexanika mühəndisliyi ixtisasının ikinci kurs tələbəsiyəm. Bu yay isə Azərbaycan Hava Yollarının Hava Gəmilərinin Uçuş Yararlılığının Saxlanılması İdarəsində (“CAMO”) təcrübə keçirəm. İyun ayından etibarən burada təyyarələrin texniki xidməti və aviasiya mühəndisliyi sahəsində praktiki bilik və bacarıqlar əldə edirəm.

- Honq Konqda təhsiliniz haqqında nə deyə bilərsiniz?

- Mühəndislik təhsili kifayət qədər çətin olsa da, eyni zamanda, son dərəcə dəyərlidir. HKU tələbələrinə möhkəm texniki bilikləri fənlərarası yanaşma və real problemlərin həlli bacarıqları ilə birləşdirən dünya səviyyəli təhsil təqdim edir. Universitet qlobal təsir, innovasiya və transformativ təhsilə xüsusi önəm verir, eyni zamanda, Şərqlə Qərb arasında mühüm körpü rolunu oynayır.

Mexanika Mühəndisliyi Departamentində tələbələr və akademik heyət arasında əməkdaşlığın gücləndirilməsinə yönəlmiş təşəbbüslərdə fəal iştirak edirəm. Çünki hesab edirəm ki, əsl inkişaf komanda işi, aktiv iştirak və davamlı inkişaf istəyindən başlayır.

- Honq Konqda hansı dərsdənkənar fəaliyyətlərdə iştirak etmisiniz?

- Universitetdə müxtəlif təşəbbüslərdə fəal iştirak etmişəm. Mühəndislik fakültəsinin tanıtım günü (“Information Day”) və Orientasiya proqramlarının təşkilində dəstək göstərib, həmçinin “Brown Pre-College” proqramından keçmiş professorum, professor Thomas J.Websterin iştirakı ilə HKU-da ilk tələbə təşəbbüsü əsasında təşkil olunan "NanoTalk" tədbirini təşkil etmişəm.

Bundan əlavə, komandamız HKU-nun Dayanıqlı İnkişaf üzrə Liderlik Proqramı çərçivəsində təşkil etdiyimiz "Swap & Share" kampus ianə kampaniyası ilə birinci yerə layiq görülüb. Daha sonra isə HKU-nun “Sustainability” bölməsində student helper kimi fəaliyyətə başlamışam. Həmçinin Humanitar elmlər fakültəsinin təşkil etdiyi "Lead for Life" proqramına qoşulmuşam.

Bu proqram müxtəlif ixtisaslardan olan tələbələri bir araya gətirib, müxtəlif sahələrin peşəkarları ilə birlikdə liderlik bacarıqlarını inkişaf etdirmək imkanı yaradır. Eləcə də, qaldığım “University Hall” yataqxanasının Tələbə Assosiasiyasında Cari Məsələlər üzrə katib (“Current Affairs Secretary”) kimi fəaliyyət göstərirəm. Komandamız HKU-nun ən qədim yaşayış kolleclərindən birinin ənənələrini və güclü icma ruhunu qoruyub inkişaf etdirmək istiqamətində çalışır.

- Honkonqda yaşamaq sizə necə təsir edib?

- Honkonq yaşamaq üçün həqiqətən də gözəl şəhərdir. İsti və rütubətli iqlimi sayəsində payızın sonu və yazın əvvəlində belə dənizdə üzmək mümkündür. Burada ingilis dili geniş istifadə olunduğundan, beynəlxalq tələbələr üçün yeni mühitə uyğunlaşmaq xeyli asan olur. Azərbaycan mətbəxi hər zaman mənim üçün birinci yerdə olacaq. Bununla belə, zaman keçdikcə kanton mətbəxinin özünəməxsus dadını və zəngin kulinariya ənənələrini də qiymətləndirməyə başlamışam. Çin dilini öyrənmək istəyənlər üçün isə yerli insanlar adətən həvəslə kömək edirlər.

Honkonqdakı təcrübəmi daha dəyərli edən amillərdən biri də burada formalaşmış azərbaycanlı tələbə icmasıdır. Hazırda Honkonqun müxtəlif universitetlərində 50-dən çox azərbaycanlı tələbə təhsil alır və biz həm akademik, həm də şəxsi baxımdan bir-birimizi daim dəstəkləyirik. Eyni zamanda, icmamızı daha da gücləndirmək, Azərbaycanı tanıtmaq və iki region arasında əlaqələri inkişaf etdirmək məqsədilə gələcəkdə müxtəlif şəbəkələşmə və mədəni tədbirlər təşkil etməyi planlaşdırırıq.

- Yay tətilində Bakıda hansı planlarınız var?

- Bu yay aviasiya sahəsində praktiki təcrübə qazanmağa həsr etməyə qərar verdim. Məhz buna görə də, Azərbaycan Hava Yollarında üçaylıq Təyyarə Texniki Xidməti və Aviasiya Mühəndisliyi üzrə təcrübə proqramında iştirak edirəm.

- Azərbaycan Hava Yollarındakı təcrübəniz haqqında daha ətraflı danışa bilərsinizmi?

- AZAL-da qazandığım təcrübə gözləntilərimi tamamilə üstələdi. Təcrübə müddətində “CAMO Engineering”, “Power Plant”, “Line and Base Maintenance”, “Maintenance Planning” və “Technical Operations” komandaları ilə işləmək imkanı əldə etmişəm. Bu komandaların birgə fəaliyyətini yaxından müşahidə etmək mənə təyyarə texniki xidməti mühəndisliyi və aviaşirkətin əməliyyatları haqqında daha dərin anlayış qazandırıb.

Məni ən çox təsirləndirən məqamlardan biri təcrübəli mühəndislərin, mütəxəssislərin və rəhbər şəxslərin təcrübəçilərə bilik və təcrübələrini böyük həvəslə ötürmələri oldu. Buradakı dəstəkləyici və əməkdaşlığa əsaslanan mühit bu təcrübəni həm peşəkar, həm də şəxsi inkişafım baxımından olduqca dəyərli edib. Bu təcrübə aviasiya mühəndisliyinə olan marağımı daha da gücləndirib və gələcəkdə bu sahədə karyera qurmaq istəyimi möhkəmləndirib.

- AZAL-ın yeni “Airbus A321neo” təyyarəsi barədə nə düşünürsünüz?

- Azərbaycan Hava Yollarının ilk “Airbus A321neo” təyyarəsinin gəlişinin şahidi olmaq mənim üçün böyük şərəf idi. Bu, aviaşirkət üçün tarixi bir hadisə oldu. Həmin təyyarəni qarşılamaq üçün orada olmaq məni həqiqətən çox sevindirdi. Hətta bu anları instaqram səhifəmdə paylaşdım və video 70 mindən çox baxış topladı.

“Airbus A321neo” bu gün mülki aviasiyada istifadə olunan ən müasir dar gövdəli təyyarələrdən biridir. “CFM LEAP” mühərrikləri sayəsində daha yüksək yanacaq səmərəliliyi və daha aşağı emissiyalar təmin edir, eyni zamanda, daha çox sərnişin tutumu və yüksək komfort təqdim edir.

Azərbaycanın irsindən və milli kimliyindən ilhamlanaraq hazırlanmış yeni salon dizaynı ilə birlikdə hesab edirəm ki, bu təyyarə Azərbaycan Hava Yollarının modernləşməsi və gələcək inkişafı yolunda mühüm addımdır.

- Gələcək planlarınız nələrdir?

- HKU-da təhsil aldığım müddətdə qarşıma çıxacaq hər bir imkandan yararlanmağa, həm akademik, həm peşəkar baxımdan inkişaf etməyə çalışıram. Gələcəkdə isə qlobal aviasiya və aerokosmik sənayelərinə innovativ mühəndislik həlləri ilə töhfə verməyi və dünya aviasiyasının daha dayanıqlı və texnoloji cəhətdən inkişaf etmiş gələcəyinin formalaşmasına öz töhfəmi verməyi hədəfləyirəm.

- Bu sahədə karyera qurmaq istəyən gənclərə nə tövsiyə edərdiniz?

- İlk növbədə özünüzə inanın, daim öyrənməyə açıq olun və maraq hissinizi heç vaxt itirməyin. Rahatlıq zonanızdan çıxmaqdan və çətinlikləri qəbul etməkdən çəkinməyin. Çünki hər bir təcrübə insanın inkişafına töhfə verir.

_{Müxbir - Pərvanə Qafarova}