“AZƏRENERJİ” TENDERDƏ İŞTİRAKA DƏVƏT EDİR
“Azərenerji” Səhmdar Cəmiyyətinin rəhbərliyi Mingəcevirdəki Azərbaycan DRES-ın 9-çu enerji blokunun tikintisinin başa çatdırılması layihəsinə maraq göstərən bir sıra xarici şirkətlərə müraciət etmişdir.
Səhmdar cəmiyyətinin mətbuat xidmətindən bildirmişlər ki, həmin iş Azərbaycan hökuməti və “Azərenerji” tərəfindən öncül istiqamətlər kimi müəyyənləşdirilmişdir. SC rəhbərliyi ilin axırınadək bütün hazırlıq işlərini başa çatdırmaq və müvafiq tender elan etmək niyyətindədir.
Məktubla müraciət edilmiş şirkətlər arasında Rusiyanın “YES Rossii”, “Enerqomaşeksport”, “Mosenerqomontaj”, “Texnopromeksport”, “Eloktrosila” səhmdar cəmiyyətləri, habelə Çin, Almaniya və digər ölkələrin şirkətləri də vardır.
“Azərenerji” bu layihəyə göstərdikləri marağı nəzərə alaraq onların mütəxəssislərini layihənin təfərrüatını müzakirə etmək üçün yaxın vaxtlarda Bakıya gəlməyə dəvət etmişdir.
Layihəni maliyyələşdirmək üçün kredit məsələsi barədə beynəlxalq maliyyə təsisatları ilə danışıqlar aparılır. Ötən həftə Bakıda Azərbaycan hökuməti ilə İslam İnkişaf Bankı \İİB\ arasında qarşılıqlı anlaşma haqqında memorandum imzalanmışdır. Həmin sənəddə bildirilir ki, İİB-nın Azərbaycandakı cari və gələcək layihələri müzakirə edilərkən 9-cu blokun tikintisinin kreditləşdirilməsi ön sıraya çıxarılmışdır. Bu blokun tikintisini başa çatdırmaq üçün 50 milyon dollar vəsait lazımdir.
Bölmənin digər xəbərləri
