“Azəriqaz”: Qaz şəbəkəsinin hər kilometri üzrə xərcləri 15 faizə qədər azaltmaq əsas hədəfimizdir
Bakı, 29 aprel, AZƏRTAC
“Azəriqaz” İstehsalat Birliyinin Yeni Əməliyyat Modelinə keçidi davam edir.
AZƏRTAC xəbər verir ki, bu sözləri “Azəriqaz” İB-nin baş direktorunun birinci müavini Nail Abdullayev “Caspian Energy Club”ın təşkilatçılığı ilə keçirilən Milli Biznesin İnkişafı Forumunda çıxışı zamanı deyib.
O bildirib ki, 2023-2025-ci il ərzində keçirilmiş 4 rəhbər komitədə 27 təşəbbüs təsdiq edilib.
“Texniki itkiləri 50 faizdən çox azaltmaq, plastik yeraltı qaz xətlərinin tətbiqi ilə şəbəkənin 10 min kilometrlik hissəsini modernizasiya etmək, qaz təchizatının fasiləsizliyini 5 qat artırmaq (SAIDI), müştəri məmnuniyyəti indeksini (ASAN index qiymətləndirmə) 1-ci pilləyə yüksəltmək, qaz şəbəkəsini rəqəmsallaşdırmaqla SOCAR qrupunda aparıcı innovativ şirkət olmaq, bir kilometr üzrə kapital xərclərini 15 faizə qədər azaltmaq bizim əsas hədəflərimizdir”, - deyə o qeyd edib.
Nail Abdullayev əlavə edib ki, Azərbaycanda qazlaşma səviyyəsi artıq 97 faizə çatıb.
Qeyd edək ki, Bakıda “Caspian Energy Club” və Azərbaycan Milli Biznes Assosiasiyasının birgə təşkilatçılığı ilə Milli Biznesin İnkişafı Forumu keçirilir.
Bölmənin digər xəbərləri
