“Azərişıq” ASC Hannoverdə keçirilən sərgidə təmsil olunub
Bakı, 8 iyun, AZƏRTAC
“Azərişıq” ASC Almaniyanın Hannover şəhərində keçirilən “HANNOVER MESSE-2022” sərgisində təmsil olunub.
“HANNOVER MESSE-2022” beynəlxalq sərgisi dünya miqyasında qabaqcıl sənaye texnologiyalarının nümayişi üzrə ən əhəmiyyətli tədbirlərdən biridir. Bu sərginin əsas predmeti hazırda sənaye və biznesin sürətli inkişafı üçün açar meyarlar hesab olunan - rəqəmsallaşma və davamlılığa yönəldilib. Sərgidə “Amazon Web Services” (AWS), “Baumüller Nürnberg”, “Schneider Electric”, “Inter Systems”, “Smart Factory”, “Siemens” və sair kimi qabaqcıl dünya şirkətləri iştirak edib.
“Azərişıq” ASC-dən AZƏRTAC-a bildirilib ki, ASC-nin təmsil etdiyi stenddə təqdim olunan istiqamətlər bunlardır. Birincisi İşğaldan azad olunmuş ərazilərdə tətbiq olunan yeni texnologiyalar və innovasiyalar, Şuşa şəhərində yeni Rəqəmsal İdarəetmə Mərkəzi və müasir ikipilləli 35/0,4kV-luq şəbəkənin tətbiqi, 110/35/0,4 kV-luq şəbəkələri tam əhatə edən müasir SK-11 SCADA dispetçer idarəetmə sisteminin tətbiqi və sair. İkinci “Azərişıq” ASC-nin fəaliyyəti, innovativ enerji həlləri və nailiyyətləridir.
“Azərişıq” ASC-nin ölkə əhalisini fasiləsiz, keyfiyyətli elektrik enerjisi ilə təmin etmək və yüksək səviyyəli xidmət göstərmək məqsədilə son illərdə həyata keçirdiyi yeni innovativ fəaliyyətin istiqamətləri, o cümlədən genişmiqyaslı yenidənqurma və təmir işləri, ağıllı (smart) sayğacların quraşdırılması, yeni yarımstansiyaların və Transformator Mərkəzlərinin tikintisi haqqında videoçarx və bülletenlər sərgi ziyarətçilərinə təqdim olunub.
Qeyd olunan sərgidə energetika sahəsinə dair rəqəmsal enerji, enerji səmərəliliyi, yaşıl enerji həlləri, neytral karbon istehsalı və enerji təchizatı, hidrogen və yanacaq məhsullarının istismarı kimi mövzular əhatə edilib.
Bölmənin digər xəbərləri
