“Azərişıq” şimal rayonlarında elektrik enerjisi təsərrüfatını yeniləyir
Bakı, 22 iyul, AZƏRTAC
Prezident İlham Əliyevin ölkədə həyata keçirdiyi sosial siyasətin tərkib hissəsi olaraq əhalinin elektrik enerjisi təchizatının yaxşılaşdırılması istiqamətində “Azərişıq” ASC qarşıya qoyulan tədbirlər proqramının icrasına məsuliyyətlə yanaşır.
ASC-nin mətbuat xidmətinin rəhbəri Vaqif Mustafayev AZƏRTAC-a bildirib ki, hazırda demək olar ki, ölkənin əksər ərazilərində elektrik enerjisi təsərrüfatının yenilənməsi istiqamətində genişmiqyaslı işlər görülür.
Şimal Regional Enerji Təchizatı və Satışı İdarəsinin (RETSİ) Şabran Elektrik Şəbəkəsində əhalini etibarlı və fasiləsiz şəkildə elektrik enerjisi ilə təmin etmək məqsədilə bir çox işlər görülüb. Şabran rayonunu elektrik enerjisi ilə təmin edən 110/10 kilovoltluq 2x16 meqavolt/amper gücündə “Rəhimli” yarımstansiyası əsaslı şəkildə yenidən qurulmuş və gücləndirilmiş, 2 ədəd əlavə 35 kilovoltluq yarımstansiya tikilib istifadəyə verilib, uzun məsafəli xətlər ləğv olunaraq abonentlər yaxın və etibarlı məsafədən elektrik enerjisi ilə təchiz olunub. Şabran rayonunun Pirəbədil kəndində yerləşən ümumilikdə 6 kəndi elektrik enerjisi ilə təchiz edən 35/10 kilovoltluq “Pirəbədil” yarımstansiyasında hazırda əsaslı yenidənqurma işləri aparılır. Həmçinin rayonun 17 kəndində yenidənqurma işləri aparılaraq kabelləşmə başa çatıb, güc mərkəzləri yaradılmaqla yeni transformatorlar quraşdırılıb.
Şimal RETSİ-nin Xaçmaz Elektrik Şəbəkəsində də geniş miqyaslı işlər görülür. Cari ilin 6 ayı ərzində yenidənqurma işləri ilə əlaqədar Xaçmaz rayonunun Müşkür kəndində, Xaçmaz şəhəri 21, 25 və 61-ci məhəllələrdə müasir tipli transformator məntəqələri quraşdırılıb, yeni kabellər çəkilib, yeni dəmir beton və ya metal dayaqlar basdırılıb. Bir sözlə adıçəkilən ərazilərin elektrik enerji sistemi tamamilə yenidən qurulub. Xaçmaz rayonunun Maqsudkənd adlanan ərazisində yararsız dayaqlar yenisi ilə əvəz olunub, yeni kabellər çəkilərək abonentlər fasiləsiz elektrik enerjisi ilə təmin olunub. Həmçinin Xaçmaz Elektrik Şəbəkəsi üzrə 60-dan çox transformator məntəqəsində cari təmir işləri görülüb. Şimal RETSİ-nin Quba Elektrik Şəbəkəsi xüsusilə ucqar dağ kəndlərində istehlakçıların dayanıqlı və keyfiyyətli elektrik enerjisi ilə təmin olunması məqsədilə yeni güc mərkəzləri istifadəyə verir. Rayonun Kuncuq kəndi ərazisində bu ilin iyun ayında 35/0,4 kilovoltluq 100 kilovolt/amper gücündə transformator məntəqəsi quraşdırılaraq istismara verilib. Bunadək Kuncuq kəndinin elektrik enerjisi ilə təchizatı qonşu Qalmıx kəndində yerləşən transformatordan qidalanıb. Kəndlər arasında olan məsafə isə 1800-2000 metrdir. Buna görə Kuncuq kəndində elektrik enerjisi çox zəif gücdə olub. Bundan başqa rayonun Qam-Qam kəndi ərazisində şəbəkələrin perspektiv inkişafı istiqamətində görüləcək işlərlə əlaqədar 35/10 kilovolt gücü 4 meqavolt/amper gücündə olan yeni “Rustov” yarımstansiyasının tikintisinə başlanılıb. Tikintini şərtləndirən amil Rustov ərazisini elektrik enerjisi ilə təchiz edən 10 kilovoltluq Rustov hava xəttinin uzunluğunun normadan çox olmasıdır (68 kilometr). Həmin yarımstansiyanın istismara verilməsi ilə mövcud 10 kilovoltluq Rustov hava xətti 3 hissəyə bölünərək ümumilikdə 13 min sakinin elektrik enerjisi ilə təchizatının dayanıqlı və keyfiyyətli olmasına şərait yaradacaq. Digər tərəfdən Əsparəsti və Qorxmazoba kəndlərinin qidalanması da yeni inşa ediləcək “Rustov” yarımstansiyasından olacaq. Bununla da Pirvahid hava xəttinin uzunluğu 4,2 kilometr qısaldılacaq.
500 dən çox sakinin yaşadığı Qubanın Caqacuq kəndinin də elektrik enerjisi şəbəkəsi tamamilə yenilənir. Yararsız naqil və dayaqlar yeni beton dayaq və kabellərlə əvəz olunur, yeni müasir tipli elektrik sayğacları quraşdırılır. Ümumilikdə Şimal RETSİ ərazisində son 6 ay ərzində istehlakçılar 12 min 860 yeni sayğacla təmin olunub.
“Azərişıq” ASC-nin regionlarda gördüyü işlərin əsas məqsədi abonentləri dayanıqlı və keyfiyyətli elektrik enerjisi ilə təchiz etmək, eyni zamanda tamamilə yenidən qurulan elektrik təchizatı şəbəkələrində itkiləri minimuma endirməkdir.
Bölmənin digər xəbərləri
