“AZƏRNEFTYANACAQ” NEFT EMALI ZAVODUNA BEYNƏLXALQ SERTİFİKATLAR TƏQDİM OLUNMUŞDUR
AZƏRTAC-ın müxbiri xəbər verir ki, mərasimi zavodun direktoru Rövnəq Abdullayev açaraq son bir ildə beynəlxalq sertifikatlar almaq üçün müəssisədə görülən tədbirlərdən danışmışdır. O bildirmişdir ki, zavodda müvafiq xidmət sahəsi yaradılmış, Avropa Keyfiyyət Təşkilatından sertifikatlar almış yüksək ixtisaslı mütəxəssislər bu işə cəlb edilmişlər. Nəticədə zavod keyfiyyəti idarəetmə üzrə İSO 9001, ekologiyanı idarəetmə sistemi üzrə İSO 14001, işçilərin sağlamlığını və təhlükəsizliyini idarəetmə sistemi üzrə OHSAS 18001 beynəlxalq sertifikatlara layiq görülmüşdür. Həmin sertifikatları müəssisəyə Türk Standartlar İnstitutunun prezidenti Kənan Malatyalı, Avropa Standartlar Təşkilatının nümayəndəsi Rikasso, Azərbaycan Respublikası Standartlaşdırma, Metrologiya və Patent üzrə Dövlət Agentliyinin baş direktoru Xalidə Məsimova təqdim edərək kollektivi bu nailiyyət münasibətilə təbrik etmişlər.
Mərasimdə Türkiyə, Monqolustan, Qazaxıstan, Qırğızıstan, Özbəkistan, Gürcüstan, Dağıstan və Şimali Kipr Türk Respublikası standartlar institutlarının rəhbər işçiləri də iştirak etmişlər. Tədbir başa çatdıqdan sonra qonaqlar müəssisədəki “Heydər Əliyev muzeyi” ilə tanış olmuşlar.
Bölmənin digər xəbərləri
