AZƏRTAc-ın XƏBƏRLƏRİ PAYTAXTIN MONİTORLARINDA

15.04.2004 [20:50]
Çap et
A⁺ A^-

İndən belə bakılılar və paytaxtın qonaqları qəzetlərə baxmadan və televizoru açmadan ölkədə və dünyada baş verən ən mühüm hadisələrdən “isti-isti” xəbər tuta biləcəklər. Azərbaycan Dövlət Teleqraf Agentliyi – AZƏRTAC “Smart Vijn” şirkəti tərəfindən Bakının bir sıra guşələrində qoyulmuş rəngli reklam monitorlarında yerləşdirilən informasiyaları vasitəsilə bu hadisələr barədə yığcam məlumat verəcəkdir.

“Smart Vijn” şirkətinin 2x3 metr ölçüdə olan monitorları AZƏRTAC-ın binası qarşısında – Bülbül prospekti ilə 28 May küçəsinin kəsişdiyi yerdə, “Azərbaycan” kinoteatrının yanında, habelə Rəsul Rza və Nizami, Səməd Vurğun və Nizami küçələrinin kəsişdiyi sahədə quraşdırılmışdır. Yəqin ki, gələcəkdə onların sayı artacaq və mərkəzdən kənarda da qoyulacaqdır.

Yolu buralardan düşən paytaxt sakinləri və şəhərimizin qonaqları hələlik gün ərzində üç dəfə - saat 9-da, 15-də və 20-də AZƏRTAC-ın ən yeni, ən operativ xəbərləri ilə tanış ola biləcəklər.

Yeri gəlmişkən, elektron qurğunun işə salındığı ilk günlərdə - aprelin 14-15-də monitorların gözoxşayan ekranlarında Azərbaycan Prezidenti İlham Əliyevin Türkiyəyə rəsmi səfərinə dair AZƏRTAC-ın xəbərləri və fotoşəkilləri verilmişdir.

Paytaxtın monitorlarında AZƏRTAC-ın xəbərlərini izləyin!

AZƏRTAc-ın XƏBƏRLƏRİ PAYTAXTIN MONİTORLARINDA

MÜƏLLİFLƏ ƏLAQƏ