“Azərtütün” bu il şimal-qərb rayonlarında 800 hektardan çox sahədə tütün əkməyi planlaşdırır

Zaqatala, 14 fevral, Mustafa Dadaşov, AZƏRTAC
Azərtütün” ASC tərəfindən respublikamızın şimal-qərb bölgəsinə daxil olan Zaqatala, Balakən, Qax, Şəki və Oğuz rayonlarında builki mövsüm üçün tütün əkininə hazırlıq işləri davam etdirilir. Tütün istehsalı ilə əlaqədar indiyədək cəmiyyət tərəfindən bu rayonlarda 43 fermerlə müqavilə bağlanılıb və hazırda proses davam edir.
Səhmdar cəmiyyətdən AZƏRTAC-ın bölgə müxbirinə bildirilib ki, indiyədək fermerlərlə bağlanılan müqavilələr üzrə tütün əkiləcək sahə 377,8 hektar təşkil edir. Bundan əlavə, şirkətin özü tərəfindən də bu il şimal-qərb bölgəsində 426,6 hektar sahədə tütün əkilməsi nəzərdə tutulur.
Hazırda tütün şitillərinin yetişdirilməsi üçün istixanalarda hazırlıq işləri görülür. Eyni zamanda, tütün əkini üçün indiyədək 800 hektardan çox sahədə don şumu aparılıb.
Xatırladaq ki, “Azərtütün” ASC ötənilki mövsümdə şimal-qərb bölgəsi rayonlarında 662,1 hektar sahədə “Virciniya botaniki” növlü tütün əkib. Bunun 218,3 hektarı şirkətə, 443,8 hektarı isə fermerlərə məxsus sahələr olub. Tütün istehsalı ilə əlaqədar 57 fermerlə müqavilə bağlanıb. Mövsüm ərzində ASC-nin bölgədə fəaliyyət göstərən tütün istehsalı və emalı məntəqələrinə fermerlərdən 8 min 188,8 ton yaş tütün daxil olub. Emal məntəqələrində yaş tütündən 1230,3 ton quru tütün istehsal olunub. Bu, əvvəlki illə müqayisədə 130,3 ton çoxdur.