“Azəryol” həndbol klubunun baş məşqçisi: Avrokubok oyunlarına ciddi hazırlaşırıq
Bakı, 1 oktyabr, AZƏRTAC
“Çox yaxşı və güclü komandaya qarşı oynayacağıq”.
Bu sözləri AZƏRTAC-a açıqlamasında qadın həndbolçulardan ibarət “Azəryol” komandasının baş məşqçisi Aleksandr Revva Avropa Kubokunun ilkin mərhələsində “Qaliçanka” (Ukrayna) komandasına qarşı keçirəcəkləri oyunlar barədə danışarkən deyib.
Rusiyalı mütəxəssis rəqibin təcrübəli komanda olduğunu bildirib: “Heyəti gənc oyunçulardan ibarət olsa da, ötən mövsüm Ukrayna çempionu və kubokunun qalibi olub. Bu ilin dekabr ayında Avropa çempionatında çıxış edəcək Ukrayna millisinin 4 həndbolçusu “Qaliçanka”nın formasını geyinir. Rəqibin müdafiəsi, eləcə də cinahları güclüdür. Vaxtilə “Azəryol” komandasında oynamış Marina Konovalova da Lvov təmsilçisində oynayır. Biz bu matçlara ciddi hazırlaşırıq və onları məğlub etməyə çalışacağıq. Ən böyük hədəf isə Azərbaycan çempionu olmaqdır”.
Qeyd edək ki, Azərbaycan və Ukrayna Həndbol federasiyalarının razılığı əsasında hər iki oyun Bakıda baş tutacaq. Görüşlər 5-6 oktyabrda keçiriləcək.
Bölmənin digər xəbərləri
