“Azexport.az” portalı Türkiyənin rəqəmsal ticarət platforması ilə əməkdaşlığa başlayır
Bakı, 19 noyabr, AZƏRTAC
İqtisadi İslahatların Təhlili və Kommunikasiya Mərkəzinin innovativ layihəsi olan “Azexport.az” internet portalı və “Tradevalley.com” portalı arasında görüş baş tutub.
Mərkəzdən AZƏRTAC-a bildirilib ki, görüşdə “Tradevalley.com” portalının təsisçisi Yusuf Yenitürkoğulları və satış meneceri Güclü İlalmak rəqəmsal ticarət sahəsində reallaşdırılan layihələr barədə məlumatlar veriblər. Vurğulanıb ki, “Tradevalley.com” portalı sahibkarlara rəqəmsal ticarət sahəsində məhsul təftişi, tərcümə, marketinq, hüquq, maliyyə və logistika xidmətləri təqdim edir.
“Azexport.az” portalının rəhbəri Ayxan Qədəşov portalın inteqrasiya olduğu beynəlxalq ticarət platformaları və bu platformalardan daxil olan sifarişlər barədə təqdimatla çıxış edib. O, “Tradevalley.com” portalı ilə əməkdaşlığın genişləndirilməsinin və birgə layihələrin icrasının vacibliyini qeyd edib.
Sonda rəqəmsal ticarət sahəsində əməkdaşlığın dərinləşdirilməsi məqsədilə anlaşma memorandumunun imzalanmasına dair ilkin razılıq əldə olunub.
Qeyd edək ki, “Tradevalley.com” portalı Türkiyədə “B2B” seqmentində fəaliyyət göstərən qabaqcıl rəqəmsal ticarət platformalarında biridir. Altı dildə fəaliyyət göstərən portala dünyanın 100-dən artıq ölkəsindən sifarişlər daxil olur.
Bölmənin digər xəbərləri
