İDMAN
Badmintonçularımız Bolqarıstanda keçirilən beynəlxalq turnirdə iştirak ediblər
Bakı, 15 avqust, AZƏRTAC
Badminton üzrə Azərbaycan millisinin üzvləri Edi Reski Dviçayo və Ezmi Qovimuramadhoni Bolqarıstanın paytaxtı Sofiyada keçirilən “Eurasia Bulgarian Open Championship” turnirində çıxış ediblər.
AZƏRTAC xəbər verir ki, idmançılarımızdan mübarizəyə təsnifat mərhələsindən başlayan Ezmi Qovimuramadhoni keçirdiyi iki görüşdə qalib gəlib. Təmsilçimiz müvafiq olaraq, Yunanıstan və Rusiya badmintonçularını məğlub edib. Lakin E.Qovimuramadhoni əsas mərhələyə yüksəlmək uğrunda görüşdə danimarkalı Mads Zogersenə 1:2 (21:12, 19:21, 14:21) hesabı ilə uduzub.
Mübarizəyə əsas mərhələdən qoşulan Edi Reski Dviçayo isə kişilərin şəxsi yarışında ilk görüşünü turnirin bir nömrəli reytinq favoriti irlandiyalı Nhat Nquyenə qarşı keçirib. Gərgin keçən görüşdə badmintonçumuz rəqibinə 1:2 (21:23, 21:17, 17:21) hesabı ilə uduzub.
İdmançılarımız turnirin qoşa yarışında danimarkalı Mads Zogersen - Filip İllum Klindt cütlüyü ilə qarşılaşıblar. Skandinaviyalı badmintonçular idmançılarımızdan 2:0 (18:21, 15:21) hesabı ilə üstün olublar.