“Bakı - Blaqoveşensk kitab körpüsü” adlı virtual kitab sərgisi davam edir
Bakı, 20 aprel, AZƏRTAC
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin beynəlxalq əməkdaşlıq çərçivəsində əlaqələri uğurla davam edir.
İdarədən AZƏRTAC-a bildirilib ki, koronavirus pandemiyası ilə mübarizə və #Evdəqal ciddi karantin rejimi dövründə kitabxanalar tərəfindən mütaliə üçün insanlara populyar və maraqlı kitabların elektron versiyası təqdim edilir, yazıçı və şairlərlə virtual görüşlər təşkil olunur.
Xatırladırıq ki, Yasamal rayon Mərkəzi Kitabxanası və Blaqoveşensk kitabxanası arasında 2018-ci ilin payızından təcrübə mübadiləsi aparılır, uğurlu layihələr həyata keçirilir.
Oxuculara təqdim olunan “Bakı - Blaqoveşensk kitab körpüsü” virtual kitab sərgisi də bu qəbildəndir. Sərgidə on üç kitab oxucuların istifadəsinə verilib.
Bakı şəhər kitabxanaçıları “Azərbaycan ədəbiyyatının virtual kitabxanası”nda olan ən çox oxunan kitabları seçib və virtual sərgiyə təqdim edib. Blaqoveşensk şəhər Mərkəzi Kitabxanasının kitabxanaçıları da öz növbəsində oradakı ən populyar kitabların statistikasını öyrəniblər.
Qeyd edək ki, sərgilənən kitablar populyar kitabların yalnız bir hissəsidir. Bu kitab rəfləri statik (dəyişilməz) xarakter daşımır, onlar dinamikdir. Rəflərdəki kitablar populyarlığına və oxucu sorğularına, baxış saylarına görə dəyişir. Kitabxanalar tərəfindən təşkil olunan növbəti sərgilərdə bu aydın görünəcək.
“Azərbaycan ədəbiyyatının virtual kitabxanası”nda olan kitablardan səkkiz ən populyar kitab seçilərək sərginin yuxarı rəfində yerləşdirilib.
Son aylar “Azərbaycan ədəbiyyatının virtual kitabxanası”na yeni kitablar yerləşdirilib. Onların arasında ən çox maraq doğuran “Dünya xalqlarının nağıllarında uşaq hüquqları” (Azərbaycan və rus dillərində), Brayan Ceyksin “Leqenda o Lyuke”, Sevinc Ağa Xəlilqızının “Əlvida söyləmədən...” kitablarıdır.
Blaqoveşensk şəhərinin oxucuları arasında beş ən çox oxunan kitab seçilib: P.N.Vranqel “Zapiski 1916-1920qq.”, “Kukolnıy teatr na Rusi. İstoriçeskiy oçerk”, “Yeqipetskiye skazki”, “Arxitektura Yaponii. Yaponskaya svetnaya qravyura”, “Pesn o Nibelunqax”.
Sözügedən kitabların elektron versiyasının oxumaq üçün oxuculara imkan yaradılıb. Onlar interaktiv nöqtələrə tıklayaraq kitabların tammətnli versiyasını görə bilərlər. “Blaqoveşensk - Bakı kitab körpüsü” virtual kitab sərgisi ilə aşağıdakı keçiddən tanış ola bilərsiniz: https://www.thinglink.com/scene/1305072218648084482
Bölmənin digər xəbərləri
