BAKI BƏLƏDİYYƏ TEATRININ ANKARAYA QASTROL SƏFƏRİ BÖYÜK MARAQ DOĞURMUŞDUR

25.05.2006 [15:02]
Çap et
A⁺ A^-

AZƏRTAC-ın xüsusi müxbiri xəbər verir ki, Azərbaycanın Türkiyədəki səfirliyi və Keçiörən bələdiyyəsinin təşkilatçılığı ilə xalq artisti, dövlət mükafatları laureatı Amaliya Pənahovanın bədii rəhbəri və direktoru olduğu Bakı Bələdiyyə Teatrının Ankaraya qastrol səfəri türkiyəli teatrsevərlərdə böyük maraq doğurmuşdur.

Martın 22-24-də Ankaranın Keçiörən rayonundakı teatrda Nəriman Nərimanovun “Nadir şah” və əməkdar incəsənət xadimi Abdulla Qurbaninin “Türk sancağı” pyeslərinin tamaşaları anşlaqla keçmişdir. Türkiyənin kütləvi informasiya vasitələri də aktyorların mükəmməl oyunu haqqında geniş yazılar dərc etmişlər.

Tamaşaları Azərbaycanın Türkiyədəki səfiri Zakir Həşimov, qardaş ölkənin keçmiş mədəniyyət naziri Namik Kamal Zeybək, Keçiörən bələdiyyəsinin başçısı Turqut Altınok seyr etmişlər. Ankara qastrolunun sonuncu günü Turqut Altınok xalq artisti Amaliya Pənahova və əməkdar incəsənət xadimi Abdulla Qurbaniyə fəxri diplomlar təqdim etmişdir.

Bakı Bələdiyyə Teatrı Ankaradan sonra Türkiyənin digər şəhərlərində də tamaşalar göstərəcəkdir.