BAKI FOND BİRJASINDA “CBONDS” AGENTLİYİ MƏHSULLARININ TƏQDİMATI OLMUŞDUR
Agentliyin baş direktoru Sergey Lyalin iştirakçıları bu qurumun fəaliyyəti ilə tanış edərək bildirmişdir ki, www.cbonds.info İnternet saytında arzu edənlərə dünyanın istiqraz vərəqələri bazarındakı vəziyyətin tam və geniş mənzərəsi ilə tanış olmaq imkanı verilir, bununla bağlı xəbərlər və konyunktura izlənilir, borc kağızlarının bütün buraxılışları barədə məlumat bazası zənginləşdirilir.
S.Lyalin demişdir: “Bakı Fond Birjası ilə əməkdaşlıq bizə Azərbaycanın maliyyə bazarındakı vəziyyət barədə məlumat bazası yaratmaq imkanı verəcəkdir. Nəticədə, müxtəlif ölkələrin maliyyə dairələri respublikanın fond bazarındakı vəziyyəti biləcəklər ki, bu da ölkəyə sərmayə axınını gücləndirəcəkdir”. Onun sözlərinə görə, dövlət, birja və bələdiyyə istiqrazları bazarı, habelə birjalarda hərracların yekunları, emissiyalar, sərmayə və analitik memorandumlar barədə məlumatlar gələcək investorların Azərbaycandakı iqtisadi vəziyyətlə ətraflı tanış olmasına imkan verəcəkdir.
Fəaliyyəti borc bazarı ilə bu və ya digər dərəcədə bağlı olan 2000-dən çox insan hər gün agentliyin saytını açır. Onların coğrafi auditoriyası da genişdir, 60-dan çox ölkəni, ilk növbədə, Rusiya, Ukrayna, ABŞ, Böyük Britaniya, Qazaxıstan, Latviya və Almaniyanı əhatə edir.
Sonda agentliyin baş direktoru jurnalistləri maraqlandıran sualları cavablandırmışdır.
Bölmənin digər xəbərləri
