“Bakı Marafonu 2018”in iştirakçıları sırasında 59 yaşlı Sumqayıt sakini də olub
Bakı, 13 may, AZƏRTAC
Bakıda marafonların keçirilməsi 2016-cı ildən başlayıb. “Bakı Marafonu 2016 və 2017”də veteranlar arasında yarışın qalibi olmuşam. Artıq üçüncü dəfədir ki, Bakıda təşkil edilən belə yüksək səviyyəli idman yarışına qatılıram.
AZƏRTAC xəbər verir ki, bu sözləri jurnalistlərə müsahibəsində “Bakı Marafonu 2018”in 59 yaşlı iştirakçısı Sumqayıt şəhər sakini Tapdıq Dadaşov deyib.
Yarışın təşkilinə görə Heydər Əliyev Fondunun rəhbərliyinə minnətdarlığını bildirən 59 yaşlı iştirakçı deyib: “Yarış yüksək səviyyədə təşkil olunub. Özümü çox yaxşı hiss edirəm. Belə yarışlar bizim kimi yaşlı insanların zövqünü oxşayır, bizləri yaşamağa səsləyir. İnsanlarda idmanla məşğul olmağa marağı artırır, fiziki cəhətdən sağlamlığı möhkəmləndirir, eyni zamanda, sağlam həyat tərzinin təbliğinə böyük töhfə verir.
Mən müxtəlif ölkələrdə marafonlarda iştirak etmişəm. İtaliyada veteranlar arasında keçirilən beynəlxalq marafonda səksən ölkənin iştirakçıları arasında yarışı 11-ci yerdə başa vurmuşam. 2014-cü ildə Türkiyədə 43 ölkənin iştirak etdiyi 10 kilometr məsafəyə qaçış üzrə veteranlar arasında qitə çempionatında altıncı yeri tutmuşam. Ümumiyyətlə Azərbaycanda belə uzun məsafəni qaçan mənim yaşda insanlar azdır”.
Bölmənin digər xəbərləri
