“Bakı Metropoliteni”: Metroda qarlı-şaxtalı hava ilə bağlı problem gözlənilmir
Bakı, 20 fevral, AZƏRTAC
Bakı metrosu qarlı-şaxtalı havalara tam hazırdır. Stansiyaların qum, duz ehtiyatı ilə hazırlığı tam yerinə yetirilib və nəzarət altında saxlanılır.
AZƏRTAC xəbər verir ki, bunu jurnalistlərə açıqlamasında “Bakı Metropoliteni” QSC-nin Kommunikasiya departamentinin rəisi Şaban İmkani bildirib.
Onun sözlərinə görə, vacib məsələlərdən biri də alət və avadanlıqların hazır olması, qarın, buzun təmizlənməsinə cəlb ediləcək işçilərin müəyyənləşdirilməsidir.
“Ən çətin vəziyyətlər depo şəraitində yarana bilər. Çünki qatarlar təkcə gecə deyil, gündüz də depoya daxil olur, ya da depodan xəttə verilir. Qatarları bir yoldan digərinə keçirən yoldəyişdiricilərin hamısı qardan və buzdan təmizlənməlidir. Buna görə depolarda qarla mübarizə qərargahları fəaliyyət göstərir. Cəlb olunacaq işçilər, onların hazırlığı davamlı yoxlanılır. Amma ən vacibi - qarı yoldəyişdiricilərdən təmizləyən üfürücü qurğuların hazırlığı hər gün, hər növbədə yoxlanılır. Bir sözlə, metroda hər hansı problem gözlənilmir”, - deyə Ş.İmkani bildirib.
Bölmənin digər xəbərləri
